“Kemi gjetur një perlë!”/ Queen sjellin surprizën e madhe, publikojnë një këngë me zë të Freddie Mercury 30 vjet pas vdekjes së tij

Queen kanë zbuluar se do të publikojnë një këngë të padëgjuar më parë me vokale të regjistruara nga artisti i ndjerë Freddie Mercury.

Anëtarët e grupit e zbuluan këngën në arkivat e tyre dhe ajo daton nga kohët e regjistrimit të ‘The Miracle’ gjatë të cilave ata vendosën rreth 30 këngë për albumin e vitit 1989 – shumë prej të cilave nuk u publikuan kurrë. Freddie vdiq në vitin 1991 për shkak të SIDA-s.

Në një intervistë në ‘BBC Radio 2’, bateristi Roger Taylor shpjegoi: “Ne gjetëm një perlë të vogël nga Freddie, të cilën e kishim harruar disi. Është e mrekullueshme. Në fakt, ishte zbulim i vërtetë. Është nga sesionet e ‘The Miracle’ dhe mendoj se do të dalë në shtator.”

Prezantuesja e emisionit e pyeti: “Kjo është e pabesueshme. Kush e gjeti në të vërtetë?”. Kitaristi Brian May u përgjigj: “Ne e dëgjuam atë shumë herë dhe menduam, ‘Oh jo, ne nuk mund ta shpëtojmë vërtet atë regjistrim. Por në fakt, ekipi ynë i mrekullueshëm inxhinierik tha se ne mund ta bëjmë këtë. Është si një lloj qepje copash së bashku. Është e bukur. Është prekëse.”

Roger shtoi: “Është një pjesë shumë pasionante.”

Pas vdekjes së Freddie, grupi ka vazhduar turneun me vokalistët Paul Rodgers dhe Adam Lambert. Intervista me grupin u zhvillua gjatë mbulimit të BBC të festimeve të Jubileut Platinium të Mbretëreshës Elizabeth, të cilat u zhvilluan gjatë javës së kaluar.

Queen + Adam Lambert ishin ndër artistët që performuan në koncertin e Palace të shtunën në mbrëmje dhe kënga e tyre ‘We Will Rock You’ ishte në sfond gjatë një skene që Mbretëresha filmoi me Paddington Bear.