Java që po nis pritet të jetë vendimtare për sa i përket finalizimeve të marrëveshjeve në shtëpinë zikaltër.
Në radhë janë Paulo Dibala dhe Kristjan Asllani, me këtë të fundit që për zyrtarizimin pret vetëm “po”-në formale të presidentit të Empolit, Fabricio Korsi.
Nga ana tjetër Paulo Dibala do të mbërrijë në Milano me parametër zero, pasi kontrata e tij me Juventusin skadon në përfundim të qershorit dhe tratativat është dashur të zhvillohen vetëm me përfaqësuesit e lojtarit.
Operacioni i nisur zyrtarisht javën e shkuar pritet të konkretizohet sot ose nesër, kur është planifikuar edhe një videokonferencë mes drejtuesve zikaltër e agjentit Horge Antun, ndërkohë që nuk përjashtohet edhe pjesëmarrja nëpërmjet videos e vetë Paulo Dibalës.
“La Joya”, që aktualisht gjendet me pushime në Majemi, ka rënë dakord me ofertën prej 6 milionë eurosh plus 1 milion në formën e bonuseve të zikaltërve, por me kohëzgjatjen ende për t’u përcaktuar.
Propozimi fillestar ishte një kontratë 3-vjeçare me opsion rinovimi edhe për 1 tjetër vit, ndërkohë që sipas “Sky Sport”, Interi po mendon ta dërgojë në 4 vite ofertën e tij.
Pikërisht për të përcaktuar këto detaje do të mbahet edhe mbledhja mes palëve, e cila do të jetë përfundimtarja para firmave, që pritet të hidhen me rikthimin e Dibalës nga pushimet, për t’i dhënë fund padurimit të zikaltërve për të përqafuar atë që pritet të jetë idhulli i ri i tyre.
Përgatiti: NISLI GJINI
Loading…
and then