Drejtuesit e Bylisit në fund të qershorit pritet që të kristalizojnë listën me lojtarët që mbyllën sezonin e shkuar dhe që do të vijojnë të përfaqësojnë ballshiotët në elitë, në sezonin 2022-2023.
Përveç kësaj, drejtuesit po mendojnë edhe për përforcimet. Presidenti Besnik Kapllanaj ndodhet në Brazil dhe nga sa është parë në disa foto që ai ka ndarë me vëllain e tij, ish-kryebashkiaku Agron Kapllanaj, ka nisur një tur vëzhgimi në disa ndeshje të skuadrave të njohura braziliane.
Ndërkohë që të dy bashkë kanë postuar foto edhe me një nga emrat e spikatur të futbollit brazilian, Zhorzhinjo, ish-lojtar i kombëtares dhe trajner. Nuk dihet nëse ka ndonjë projekt madhor për ndonjë binjakëzim me ndonjë nga ekipet braziliane me mallakastriotët. Gjithsesi, me rikthimin e presidentit Kapllanaj nga Brazili, do të zbardhen shumë detaje rreth vizitës disaditore në shtetin latino-amerikan, por edhe rreth projektit të skuadrës së sezonit të ri.
Turi i “gjuetisë” së drejtuesve të klubit të Bylisit nisi fillimisht në Afrikë e tashmë po vijon në Brazil, ku pritet të zbulojnë elementë të perspektivës për ekipin. Në 50-vjetorin e themelimit të klubit, te Bylisi pritet të ketë surpriza dhe një riorganizim të ri. Sa i përket skuadrës së sezonit që vjen, për momentin nuk ka asnjë emër nga merkatoja.
Trajneri Jeton Beqiri ka bekimin e presidencës për Superioren, ashtu sikurse edhe boshti i ekipit ku bëjnë pjesë këta lojtarë: Janku, Preka, Trumçi, Loran, Ruçi, Maçolli, Antoni, Qardaku, Biringueta, Fall, Samba dhe Kamara. Në Ballsh duket se kanë plane të qarta për Superioren, duke qenë se tashmë nuk kërkohet vetëm arritja e mbijetesës, por që Bylisi të synojë trofe në elitë.
ERJON SALIU – Arena e Lajmit
Loading…
and then