Ngjarje e rëndë në futboll, arbitri vritet nga lojtarët dhe tifozët prej një… kartoni të kuq

Hoze Arnoldo Amaja, 63 vjeç dhe arbitër nga mosha 20-vjeçare është vrarë gjatë një ndeshje futbolli pas një sulmi nga lojtarët dhe tifozët.

Ngjarja ndodhi në kryeqytetin e Salvadorit, San Salvador gjatë një ndeshje amatore në stadiumin “Toluca di Miramonte”.

Arsyeja e sulmit ishte një karton i kuq. Shokët e skuadrës së lojtarit të nxjerrë nga fusha e sulmuan gjyqtarin bashkë me tifozët që zbritën nga tribunat në fushë.

Amaja u plagos shumë rëndë në kokë dhe u dërgua me urgjencë në spital, ku mjekët konstatuan një hemorragji cerebrale fatale, e cila i mori më pas jetën.

Federata e Salvadorit dënoi ashpër ngjarjen, ndërsa policia nisi hetimet për të vënë përpara drejtësisë personat përgjegjës.

Arena e Lajmit