Shqiptari ndërron emrin për t’i shpëtuar dënimit për trafik droge dhe kthehet në Itali, por…

Një 53-vjeçar shqiptar është arrestuar nga policia italiane pasi ka rezultuar i dënuar për trafik droge.

Shqiptari u ndalua nga policia në Pontremoli për kontroll teksa drejtonte një kamion me targa italiane.

Gjithçka dukej se ishte në rregull, por vëmendjen e agjentëve e tërhoqi gjuha e shoferit, një italishte e rrjedhshme, por nga pasaporta e paraqitur rezultonte se nuk kishte qenë kurrë në Itali.

Më pas, ekspertët e policisë vendosën të thellojnë kontrollin dhe nga këqyrja e gjurmëve të gishtërinjve rezultoi se drejtuesi i kamionit ishte në realitet një person tjetër, i kërkuar për të vuajtur një dënim mbi 9 muaj burg për krime të lidhura me trafikun e lëndëve narkotike, e kryer gjatë qëndrimit të tij në Itali.

Praktikisht, pas kthimit në Shqipëri, ai kishte ndryshuar emrin e tij, i cili ishte legjitim në vendin e tij dhe kishte marrë një pasaportë të re dhe një patentë të re shoferi, duke menduar se me këtë mashtrim nuk do të zbulohej kurrë.