Kreu i Partisë së Lirisë Ilir Meta deklaroi sot në një takim me strukturat e kësaj force në Kombinat se vendi është një situatë kritike energjetike dhe se do të ketë propozime konkrete në fushën e energjisë.
“Jemi në një situatë kritike energjetike. Rama në vitin e 10-të si Kryeministër situatë e njëjtë energjetike pasi nuk ka bërë investime. Ka bërë shpërdorim kriminal të gjithë resurseve energjetike pasi ndërmarrjet janë elektorale me detyrë prodhimin e votave me të gjithë mënyrat, me shantazhe e gjoba që u vënë qytetarëve e deri tek punësimet e shpërdorimet e jashtëzakonshme me fitimet e kompanive. Situata energjetike pritet të vështirësohet.
Përrallat e larjes së rrobave me 30 gradë si dhe të fashave mbi 800 kilovat janë politikë e papërgjegjshme, kur vetë qeveria ka 200 mln euro energji të papaguar vetëm si rezultat i keqmenaxhimit të ujësjellësve që edhe ato janë kthyer në ndërmarrje elektorale”, tha Meta.
Ai theksoi se kjo nuk është një qeveri antikrizë, por burimi i krizave më të mëdha që kanë përballuar shqiptarët këto vite.
“Ne si parti e lirisë jemi të angazhuar për ligje e iniciativa konkrete dhe këto do t’i vazhdojmë dhe në fushën e energjisë pasi jemi një parti që ka vullnetin politik për një drejtim të ri të vendit, larg kësaj papërgjegjshmërie, këtij klientelizmit që ka vrarë konkurrencën, sipërmarrjen e lirë.
Ne godasim drejtpërdrejt korrupsionin. I kemi çuar SPAK-ut të dhëna konkrete, flagrante të përfshirjes së qeverisë në korrupsion. Qeveria iu kërkon qytetarëve të kursejnë, por vetë abuzon”, tha ai.
and then