Në kërkim për dhënie ndihme për kalim të paligjshëm të kufirit, arrestohet 40-vjeçari në Krujë

KRUJË

Vihet në pranga, një shtetas i shpallur në kërkim për dhënie ndihmë për kalim të paligjshëm të kufirit dhe për mosbindje ndaj urdhrit të punonjësit të Policisë.

Shërbimet e Komisariatit të Policisë Krujë, në vijim të punës për kapjen e shtetasve në kërkim dhe vënien e tyre përpara përgjegjësisë ligjore, bazuar në informacionet e siguruara nga inteligjenca informative, për vendndodhjen e një shtetasi në kërkim, kanë organizuar menjëherë punën për kapjen e tij.

Në një lokal në Fushë Krujë, shërbimet e Komisariatit të Policisë Krujë kanë lokalizuar dhe ndaluar shtetasin F. Rr., 40 vjeç, banues në Dukagjin, Krujë, të cilit Gjykata e Rrethit Gjyqësor Shkodër i ka caktuar masën e sigurisë “Arrest në burg”, për veprat penale “Dhënia ndihmë për kalim të paligjshëm të kufirit” dhe “Mosbindja ndaj urdhrit të punonjësit të policisë së rendit publik”.

40-vjeçari, më datë 30.07.2022, ka qenë duke transportuar shtetas nga vendet e treta, me një automjet tip “Ford”. Pasi është konstatuar nga punonjësit e Policisë, në hyrje të qytetit të Shkodrës, ai nuk i është bindur urdhrave të tyre për të ndaluar, por është larguar dhe më pas ka braktisur automjetin.

Shtetasi F. Rr. iu dorëzua DVP Shkodër, për veprime të mëtejshme procedurale.