U kapën duke transportuar 60 kg drogë, arrestohen dy persona në Tiranë! Po lëviznin në aksin Mamurras-Kashar, kur…

Dy persona janë arrestuar në flagrancë nga policia, pasi u kapën duke transportuar një sasi të konsiderueshme lënde narkotike në një automjet. Ngjarja ndodhi në aksin rrugor Mamurras-Kashar, në afërsi të Thumanës.

Të arrestuarit janë shtetasit Enea Tahiri, 37 vjeç, dhe Besnik Shabani, 48 vjeç, të dy banues në Tiranë. Sipas burimeve zyrtare nga Policia e Tiranës, operacioni i koduar “Interruption 3” u finalizua falë informacioneve të shpejta të siguruara nga inteligjenca policore.

Gjatë kontrollit të automjetit ku ndodheshin të dy të dyshuarit, shërbimet e policisë gjetën 59 pako me lëndë narkotike të dyshuar Cannabis Sativa, me peshë totale 60 kilogramë e 6 gramë, që dyshohet se po transportohej me qëllim shitjen. Në cilësinë e provës materiale u sekuestruan edhe automjeti dhe pakot me drogë. Materialet procedurale iu referuan Prokurorisë së Tiranës, për veprime të mëtejshme hetimore.

Njoftimi i policisë:

DVP Tiranë

Finalizohet operacioni i koduar “Interruption 3”, si rezultat i administrimit të shpejtë të informacioneve të siguruara nga inteligjenca policore.

U kapën në flagrancë duke transportuar me automjet, 59 pako me lëndë të dyshuar narkotike Cannabis Sativa (rreth 60 kg), vihen në pranga 2 shtetas.

Sekuestrohen pakot me lëndë narkotike dhe automjeti.

Në vijim të operacioneve të njëpasnjëshme për goditjen e veprimtarive kriminale në fushën e narkotikëve, Seksioni për Hetimin e Narkotikëve, në bashkëpunim me Seksionin e Forcës së Posaçme Operacionale, ka finalizuar një tjetër operacion për goditjen e tentativës për të shitur lëndë narkotike.

Si rezultat i operacionit të koduar “Interruption 3”, u arrestuan në flagrancë shtetasit E. T., 37 vjeç dhe B. Sh., 48 vjeç, të dy banues në Tiranë, për veprën penale “Prodhimi dhe shitja e narkotikëve”, kryer në bashkëpunim.

Gjatë operacionit, bazuar në informacionet e siguruara nga inteligjenca policore, shërbimet e Policisë kanë ndaluar në aksin rrugor “Mamurras-Kashar”, në Thumanë, një automjet me të cilin dyshohej se po transportohej lëndë narkotike.

Gjatë kontrollit në automjetin me drejtues shtetasin E. T. dhe pasagjer shtetasin B. Sh., shërbimet e Policisë kanë gjetur 59 pako me lëndë të dyshuar narkotike Cannabis Sativa, me peshë totale 60 kilogramë e 6 gramë, që dyshohet se po ata po e transportonin me qëllim shitjen.

Materialet procedurale iu referuan Prokurorisë së Tiranës, për veprime të mëtejshme.