Kreu i Partisë Demokratike, Sali Berisha, ka reaguar me tone të ashpra në një konferencë për shtyp lidhur me zgjatjen me 6 muaj të hetimeve ndaj Ilir Metës, Presidentit të Partisë së Lirisë. Berisha e cilësoi situatën si një “burgosje politike” dhe një “shkelje të rëndë të të drejtave të njeriut”.
Sipas tij, Meta ndodhet në burg pa asnjë provë penale konkrete dhe pa një fletë-arresti të rregullt, ndërkohë që dosja e paraqitur në gjykatë nuk përmban fakte që ta mbajnë në qeli. Ai akuzoi kryeministrin Edi Rama për një urdhër politik të drejtpërdrejtë për arrestimin e një kundërshtari të mbrojtur me ligj nga Garda e Republikës.
“Kjo është forma më e shëmtuar e një narko-diktature. Sipas Huntington, narko-diktatura nuk njeh ligj, rregull apo parim. Kështu ndodh edhe sot në Shqipëri,” – deklaroi Berisha.
Ai shtoi se veprime të tilla përbëjnë shkelje të Konventës Europiane për të Drejtat e Njeriut dhe standardeve ndërkombëtare të drejtësisë, duke e cilësuar situatën si një përndjekje politike në emër të urrejtjes ndaj kundërshtarëve të qeverisë. Berisha theksoi se opozita nuk do të heshtë përballë këtij zhvillimi dhe do të mbrojë çdo qytetar që sipas tij bie viktimë e drejtësisë së kontrolluar nga qeveria.
Kreu i PD Sali Berisha në konferencë për mediat: Ilir Meta është në burg, pa asnjë fakt penal. U kërkuan 6 muaj shtesë hetime. Kjo përbën shkelje të rëndë të ligjeve të vendit dhe konventave ndërkombëtare të të drejtave të njeriut. Forma më e shëmtuar e diktaturave është narko-diktatura. Huttington thotë se narko-diktatura nuk zbaton asnjë ligj, asnjë rregull, kriter dhe parim. E kanë arrestuar pa i paraqitur fletë-arresti, sepse Edi Rama donte që me çdo kusht, që ai të goditej, një person që mbrohet nga Garda e Republikës. E mbajnë në qeli pa provë, vetëm urdhër politik. Dorëzojnë dosje në gjykatë pa fakt penal dhe vendosin t’ja zgjasin hetimet edhe 6 muaj dhe për këtë qëllim e mbajnë në burg. Nuk ka kufi urrejtja e Ramës ndaj kundërshtarëve politikë.
Fjala e Berishës:
Vendimi i fundit i kreut të organizatës kriminale Edi Rama dhe Altin Troplinit për të mbajtur në burg kryetarin e Partisë së Lirisë, partisë së dytë më të madhe opozitare, është një akt politik, kriminal që dëshmon frikën dhe tmerrin e Edi Ramës nga Ilir Meta.
Që dëshmon papajtueshmërinë e tij, intolerancën absolute atërore ndaj opozitës dhe opozitarizmit.
Ilir Meta u burgos në mënyrë brutale, pa asnjë urdhër arresti, me urdhër të vetëm të Edi Ramës.
Ilir Meta u mbajt dhe mbahet në burg si person në hetim pa asnjë provë, asnjë fakt penal.
Ndaj tij, edhe pasi dorëzoi dosjen në gjykatë, Altin Troplini me urdhër të Edi Ramës, kërkoi shtytje 6 muaj të hetimeve.
Kjo përbën shkelje të rëndë të ligjeve të vendit dhe konventave ndërkombëtare për të drejtat e njeriut.
Kjo dëshmon edhe njëherë për të shumtën herë, konkluzionin e Samuel Huntington se forma më e shëmtuar e diktaturave, midis të gjitha diktaturave, është bandokracia apo narkodiktatura.
Huntington, ky historian gjenial dhe sociolog, në analizën që u bën diktaturave, konkludon se narkodiktatura është forma më e keqe e tyre.
Sepse, thotë Huntington, kjo diktaturë nuk respekton asnjë parim, asnjë rregull, asnjë ligj, asnjë kriter.
Urdhëroni pra, e kanë arrestuar pa i paraqitur fletë arrestin, sepse Edi Rama me çdo kusht donte që të goditej nga banditë që i kishte dërguar për atë qëllim. Një person i mbrojtur nga Garda e Republikës.
E mbajnë në qeli pa asnjë provë, vetëm urdhër politik.
Dorëzojnë dosje në gjykatë pa fakt penal dhe vendosin t’i zgjasin edhe 6 muaj hetimet dhe për këtë qëllim duhet mbajtur në burg.
Nuk ka kufi urrejtja e Edi Ramës për kundërshtarin politik.
Ajo është identike me urrejtjen e babait të tij xhelat, që firmosi në gusht të vitit 1988, varjen në litar të kundërshtarit politik, Havzi Nela.
Ajo është e njëjtë me dajon e tij xhelat, Spiro Koleka, që kërkonte me 11 dhjetor të vitit 1990, tanket dhe mitrolozët mbi studentët.
Edi Rama është një njeri që udhëhiqet verbërisht vetëm nga urrejtja dhe fakultetet më të errëta të qenies njerëzore.
Duke shprehur solidaritetin e plotë me kryetarin e Partisë së Lirisë, Ilir Meta, dënoj me forcën më të madhe vendimin e fundit të Edi Ramës dhe Altin Troplinit dhe i garantoj se do përgjigjen për këtë vendim.
I bëj thirrje komunitetit ndërkombëtar të qëndrojë vendosmërisht ndaj narkoregjimit të Edi Ramës, i pari dhe i vetmi i këtij lloji në Europë.
and then