Presidenti francez bëri një vizitë gjashtë-orëshe në territorin autonom danez gjatë rrugës për në G7 në Kanada.
Ai kritikoi kërcënimet e Presidentit të SHBA-së Donald Trump për aneksimin e Groenlandës.
“Kjo nuk është ajo që bëjnë aleatët”, tha Macron ndërsa mbërriti në Nuuk, kryeqytetin e Groenlandës. Macron është kreu i parë i shtetit të huaj që viziton territorin e gjerë, të vendosur në kryqëzimin e Atlantikut dhe Arktikut, që nga kërcënimet e aneksimit të Trump. Trump, që nga kthimi në Shtëpinë e Bardhë në janar, ka thënë vazhdimisht se Amerika ka nevojë për ishullin e vendosur strategjikisht dhe të pasur me burime për arsye sigurie, dhe ka refuzuar të përjashtojë përdorimin e forcës për ta siguruar atë. Danimarka gjithashtu ka theksuar vazhdimisht se Groenlanda “nuk është në shitje”. Macron tha se vizita e tij kishte për qëllim të përcillte “solidaritetin e Francës dhe të Bashkimit Evropian” për “sovranitetin dhe integritetin territorial” të Grenlandës.
Duke folur në një konferencë për shtyp të mbajtur jashtë në Portin e Vjetër në Nuuk, udhëheqësi francez theksoi “integritetin territorial” të ishullit, ndërsa dhjetëra banorë të Grenlandës brohoritën dhe valëvitën flamurin kuq e bardhë të territorit të tyre. “Të gjithë mendojnë – në Francë, në Bashkimin Evropian – se Groenlanda nuk duhet të shitet, nuk duhet të merret”, u tha Macron gazetarëve ndërsa përfundoi një vizitë gjashtë-orëshe të shoqëruar nga kryeministrja daneze Mette Frederiksen dhe kryeministri i Grenlandës Jens-Frederik Nielsen.
Macron më parë e nisi vizitën e tij me bisedime në bordin e një fregate daneze me Frederiksen dhe Nielsen, duke diskutuar ndër të tjera “bashkëpunimin në rritje” midis Rusisë dhe Kinës në rajon, tha ai. Franca ishte gati të zhvillonte stërvitje të përbashkëta ushtarake me vendet e Arktikut, në kuadër të NATO-s dhe NB8 vendeve nordike dhe baltike, për të siguruar sigurinë në rajon, tha Macron.
Macron më pas vizitoi një akullnajë për të parë nga afër efektet e ngrohjes globale. Udhëtimi i tij në Groenlandë ishte “një sinjal më vete, i bërë me kërkesë të autoriteteve daneze dhe të Groenlandës”, tha zyra e tij përpara vizitës.
Macron tha se BE donte të “përshpejtonte zbatimin” e një partneriteti me Groenlandën mbi mineralet, duke përfshirë metalet strategjike. “Partneriteti strategjik” i nënshkruar në vitin 2023 “duhet të na lejojë të zhvillojmë zinxhirë vlerash të qëndrueshëm në sektorin e lëndëve të para strategjike”, u tha ai gazetarëve. BE-ja ka përcaktuar 25 minerale, duke përfshirë metale të rralla dhe grafit të gjetura në Groenlandë, si lëndë të para kritike.
Ftesa daneze për Macronin bie ndesh ashpër me pritjen e bërë Zëvendëspresidentit të SHBA-së JD Vance, udhëtimi njëditor i të cilit në Groenlandë në mars u pa si një provokim si nga Nuuk ashtu edhe nga Kopenhageni. Gjatë vizitës së tij në bazën ushtarake amerikane Pituffik, Vance e kritikoi Danimarkën për mos “bërjen e një pune të mirë me popullin e Groenlandës”, duke pretenduar se ata kishin neglizhuar sigurinë. Baza Pituffik është një pjesë thelbësore e infrastrukturës së mbrojtjes nga raketat e Uashingtonit, vendndodhja e së cilës e vendos atë në rrugën më të shkurtër për raketat e lëshuara nga Rusia në Shtetet e Bashkuara.
Sondazhet tregojnë se shumica dërrmuese e 57,000 banorëve të Groenlandës duan të bëhen të pavarur nga Danimarka – por nuk dëshirojnë të bëhen pjesë e Shteteve të Bashkuara. Ndryshe nga Danimarka, Groenlanda nuk është pjesë e Bashkimit Evropian, por është në listën e
Territoreve Jashtë Shtetit të lidhura me bllokun. Arktiku ka fituar rëndësi gjeostrategjike ndërsa gara për metale të rralla po nxehet dhe ndërsa shkrirja e akullit e shkaktuar nga ngrohja globale hap rrugë të reja transporti detar.
Kopenhageni në janar njoftoi një plan prej 2 miliardë dollarësh për të rritur praninë e saj ushtarake në rajonin e Arktikut. NATO gjithashtu planifikon të krijojë një Qendër të Operacioneve të Kombinuara Ajrore (CAOC) në Norvegji mbi Rrethin Arktik, pasi Rusia synon të forcojë praninë e saj ushtarake në rajon.
and then