Zjarri në malin e Krastës vihet nën kontroll, vijon puna për izolimin e plotë të vatrave

Pas një ndërhyrjeje nga forcat zjarrfikëse dhe Forcat e Armatosura, është vënë nën kontroll zjarri që përfshiu malin e Krastës në Elbasan.

Ministria e Mbrojtjes bëri të ditur se aktualisht po vijon puna për izolimin dhe shuarjen përfundimtare të vatrave të mbetura, ndërsa monitorohet terreni për të parandaluar riaktivizimin e flakëve për shkak të erës.

Në këtë operacion morën pjesë 12 efektivë të Forcave të Armatosura dhe një mjet zjarrfikës nga Detashmenti i Mbrojtjes Rajonale Mengël.

Ndërkohë, strukturat e mbrojtjes civile, në bashkëpunim me autoritetet lokale dhe Agjencinë Kombëtare të Mbrojtjes Civile, mbeten në gatishmëri të plotë për të mbrojtur komunitetin dhe pasuritë natyrore të zonës.