Një zjarr ka rënë pasditen e sotme në zonën e mbrojtur të Malit me Gropa, në fshatin Bize të Martaneshit, në territorin e Bashkisë Bulqizë. Zjarri ka përfshirë rreth 5 dynym tokë të mbuluar me pyje ahu shumëvjeçar, duke shkaktuar dëme në një nga sipërfaqet natyrore me vlera të veçanta ekologjike.
Menjëherë pas njoftimit, në terren kanë ndërhyrë forcat e ADZM Dibër, zjarrfikësit e Bulqizës dhe banorë të zonës, të cilët kanë bërë të mundur izolimin e flakëve dhe ndalimin e përhapjes së mëtejshme të zjarrit.
Autoritetet kanë nisur hetimet për të përcaktuar shkakun e zjarrit, ndërsa u bëhet thirrje qytetarëve të tregojnë kujdes të shtuar, veçanërisht gjatë sezonit të verës, për të shmangur incidente të ngjashme që rrezikojnë mjedisin dhe biodiversitetin e zonave të mbrojtura.
and then