Operacioni “Fast”, gjykata e Elbasanit cakton masat e sigurisë për 14 të arrestuarit 

Në Gjykatën e Shkallës së Parë të Juridiksionit të Përgjithshëm Elbasan u zhvillua sot seanca për vlerësimin e arrestit dhe caktimin e masave të sigurisë për 14 shtetas të arrestuar gjatë kësaj jave në një lokal pranë segmentit rrugor Elbasan–Ish-Metalurgji, në fshatin Katund i Ri.

Arrestimet u realizuan si rezultat i një operacioni policor të koduar “Fast”, i cili u zhvillua nën drejtimin e Prokurorisë së Rrethit Gjyqësor Elbasan. Operacioni u organizua pas administrimit të menjëhershëm të informacioneve të siguruara në rrugë operative nga shërbimet e Komisariatit të Policisë Elbasan, në bashkëpunim me Forcën e Posaçme “Shqiponja” dhe Forcën e Posaçme Operacionale.

Gjatë ndërhyrjes në ambientet e një lokali në pronësi të shtetasit T.Z., u kapën në flagrancë 14 persona, të cilët sipas Policisë rezultojnë me precedentë penalë të theksuar në fushën e krimeve kundër personit dhe narkotikëve, duke përbërë rrezikshmëri të lartë shoqërore.

Të arrestuarit janë:

• E. T., 39 vjeç; H. M., 25 vjeç; A. K., 49 vjeç; M. S., 47 vjeç; B. M., 53 vjeç (sipërmarrës); J. M., 30 vjeç; A. D., 49 vjeç; E. D., 29 vjeç – banues në Tiranë;
• T. Z., 52 vjeç; S. M., 46 vjeç; E. C., 36 vjeç; E. C., 32 vjeç – banues në Elbasan;
• B. H., banues në Itali;
• Një 17-vjeçar, djali i pronarit të lokalit.

Gjatë operacionit dhe kontrolleve të mëvonshme në lokalin dhe banesat e personave të ndaluar, u sekuestruan:

• 3 armë zjarri (pistoleta) dhe municion luftarak
• Dorezë elektroshoku (neuroparalizuese)
• 4 radio të ngjashme me ato të Policisë
• Jelek me mbishkrimin “Policia”
• Objekte që ngjajnë me armë zjarri dhe sinjalizues në formë pistolete
• Thikë, shkop metalik
• Shuma të konsiderueshme parash, 4 automjete, 13 celularë dhe pajisje DVR

Prokuroria ka dokumentuar veprimtarinë e tyre kriminale dhe ka ngritur akuza për një sërë veprash penale, të kryera në bashkëpunim, përfshirë:

• “Prodhimi dhe mbajtja pa leje e armëve luftarake dhe municionit”
• “Kundërshtimi i punonjësit të policisë së rendit publik”
• “Moskallëzimi i krimit”
• “Veprime që pengojnë zbulimin e së vërtetës”
• “Përkrahja e autorit të krimit”
• “Mbajtja pa të drejtë e uniformës”
• “Prodhimi, mbajtja, blerja apo shitja pa leje e armëve të ftohta”

Pas shqyrtimit të kërkesës së Prokurorisë dhe pretendimeve të palëve, gjyqtarja Megi Strakosha shpalli masat e sigurisë për të arrestuarit:

• Masa “detyrim paraqitje” për biznesmenin Bujar Muça
• “Arrest me burg” për 6 persona
• “Detyrim paraqitje” për 5 persona të tjerë
• “Arrest në shtëpi” për 1 shtetas

Policia dhe Prokuroria kanë bërë me dije se hetimet do të vijojnë për identifikimin e bashkëpunëtorëve të tjerë të mundshëm dhe për zbardhjen e plotë të veprimtarisë kriminale të këtij grupi.

BalkanWeb