Zyra Evropiane Kundër Mashtrimit (OLAF) ka konfirmuar se hetimi për fondet IPARD në Shqipëri ka zbuluar shkelje serioze dhe parregullsi në zbatimin e programit.
Drejtoresha në detyrë e OLAF, Salla Saastamoinen, deklaroi se janë konstatuar probleme që prekin fonde në vlerën e 33 milionë eurove, ndërsa Komisioni Evropian ka vendosur të ngrijë përkohësisht 112 milionë euro financime për Shqipërinë, deri në ndërmarrjen e masave konkrete dhe reformave të besueshme nga qeveria shqiptare.
Në një intervistë për “Monitor”, Saastamoinen theksoi se bashkëpunimi me autoritetet shqiptare ka pasur sfida, veçanërisht në fillim, për shkak të paqartësive për kompetencat e OLAF dhe mungesës së strukturave efektive në nivel vendor. Ajo paralajmëroi se strategjitë e miratuara nuk mjaftojnë nëse nuk zbatohen realisht, dhe se Komisioni Evropian do të vlerësojë vetëm masat praktike, jo premtimet.
Drejtoresha tha se OLAF ka kërkuar përmirësim të ndjeshëm në auditim, kontroll dhe raportim të parregullsive nga autoritetet shqiptare, duke përfshirë AZHBR dhe institucionet që menaxhojnë fondet. Saastamoinen theksoi se nëse Shqipëria synon të menaxhojë fonde më të mëdha si vend anëtar, ajo duhet të rrisë ndjeshëm kapacitetet institucionale dhe të forcojë luftën kundër korrupsionit.
Po ashtu, ajo vuri në dukje mungesën e ndërgjegjësimit publik për rolin e OLAF-it, si dhe nevojën për të inkurajuar denoncimin anonim nga qytetarët dhe rolin e gazetarisë investigative në zbulimin e rasteve të abuzimit.
OLAF paralajmëron se mënyra si Shqipëria menaxhon fondet IPARD do të ndikojë drejtpërdrejt në besueshmërinë e saj si vend kandidat për në BE.
BalkanWeb
and then