McLareni është në qendër të kritikave: Preferojnë Norrisin

Kanë mbetur vetëm gjashtë gara dhe tre sprinte, deri në përfundimin e Kampionatit Botëror të Formulës 1, ndërsa fokusi kryesor është te rikthimi i mundshëm i Maks Vershtapenit. Pas dy fitoreve dhe një vendi të dytë, kampioni në fuqi është 63 pikë prapa Oskar Piastrit. Australiani i MekLarenit kryeson aktualisht me 22 pikë më shumë se shoku i tij i skuadrës, Lando Norris.

Në letër duket se gjithçka është në dorën e “papaja”-ve, të cilët kanë siguruar titullin e dytë radhazi të konstruktorëve, por në Formula 1 gjithçka është e mundur, dhe gjithnjë e më shumë po shtohen dyshimet rreth ekipit të britanik. Ka një faktor të qartë të rënies së performancës, me MekLarenin që duket se nuk po e mban ritmin e shkëlqyer të gjysmës së parë të sezonit. Por ka edhe çështje të brendshme që po krijojnë paqartësi në kampin britanik.

Rregullat “papaja” po duken gjithnjë e më të brishta, siç u pa në Singapor, ku përplasja mes Norrisit dhe Piastrit solli tension, dhe gjithashtu mbeten pa sqarim shumë pikëpyetje nga nisja e atij çmimi të madh në Azinë Juglindore, apo dhe “lojërat e dyshimta” në Itali me ndalesën e ngadaltë të Norrisit. Disa zëra me përvojë në F1 sugjerojnë se kemi të bëjmë me favorizim. “MekLaren, nuk e kuptoj pse, por duket se preferon Lando Norrisin”, deklaron Mario Andreti, kampioni i botës me Lotus në vitin 1978 dhe një nga figurat më me peshë në historinë e këtij sporti. “Më pëlqen Piastri për guximin që ka, është më i qetë dhe ka një qasje më të matur”, shton amerikani gjatë një interviste për “Corriere”.

Në bazë të precedentëve, favorizimi i një piloti ose mungesa e kontrollit të situatave të brendshme rrallëherë japin rezultate pozitive. Vetë MekLaren e ka ndjerë këtë në kurriz në vitin 2007, kur nën drejtimin e Ron Denis, ekipi u përqendrua te debutuesi Luis Hamilton, duke lënë në hije yllin e tyre të ri, kampionin e dyfishtë Fernando Alonso. Situata doli jashtë kontrollit, me përplasje të hapura brenda dhe jashtë pistës.

Kulmi arriti në Hungari, ndërsa sezoni përfundoi me titullin që shkoi për Kimi Raikonenin dhe Ferrarin. MekLaren e di mirë se çfarë nuk duhet të përsërisë. Lajmi i mirë për ta është që ende kanë një avantazh ndaj Vershtapenit dhe disa pista të favorshme në calendar, përfshirë garën e kësaj fundjave në Ostin. “Kemi një mundësi të mirë për të vazhduar me grumbullimin e pikëve. Është një nga pistat e preferuara të pilotëve dhe do të bëjmë maksimumin”, u shpreh Andrea Stela, shefi i ekipit portokalli.

BalkanWeb