Berisha: Balluku nuk është kokë turku, është e përfshirë deri në veshë në aferë – Rama ka dalë lakuriq
Kryetari i Partisë Demokratike, Sali Berisha, ka reaguar ashpër ndaj aferës së tunelit të Llogarasë, duke akuzuar kryeministrin Edi Rama dhe zëvendëskryeministren Belinda Balluku për përgjegjësi direkte në këtë skandal financiar.
“Ajo nuk është kokë turku. Nuk është e para në këtë aferë, por është e përfshirë deri në veshë, përgjegjëse për tërësinë e aferës,” – deklaroi Berisha.
Sipas tij, Rama dhe Balluku kanë bashkëpunuar ngushtë në këtë projekt korruptiv. “Këtej thotë ‘palloshi i gjatë’, këtej firmos 50 milionë. Kjo është afera ku mbreti ka dalë lakuriq. Nuk mund t’ia faturojmë të gjitha sulltaneshës, s’mund ta mbrojmë,” – theksoi ai.
Berisha shtoi se skema e ndjekur në këtë rast është e ngjashme me atë të ndërtimit të aeroportit të Vlorës. “Ai ka bërë njësoj si me aeroportin e Vlorës, kjo (Balluku) duke zbatuar porositë e tij. Ku mund të bënte ministrja aeroportin në natyrë? Kurrë! Ka një mekanizëm të thjeshtë: në fillim e ndërton me 100 mijë pasagjerë, më pas e shton, siç është bërë me aeroportin e Tiranës,” – u shpreh Berisha.
Kreu i opozitës theksoi se, sipas tij, Rama kishte përgatitur terrenin për të përfituar financiarisht nga projekti. “Kishte bërë gati Rama të vidhte, ndaj nxori këtë skemë,” – përfundoi Berisha.
and then