Nënkryetari dhe deputeti i Partisë Demokratike, Agron Gjekmarkaj, i ftuar në emisionin “Kjo Javë” në News24, foli për pasojat politike të çështjes së Belinda Ballukut dhe mundësinë e krijimit të një qeverie teknike. Ai theksoi se rasti i pezullimit dhe marrjes së statusit të të pandehurës nga SPAK për Ballukun e ka rënduar situatën politike dhe ka shtuar, sipas tij, presionin për ndryshim.
I pyetur për mundësinë e ngritjes së një qeverie teknike pas zhvillimeve të fundit, Gjekmarkaj u shpreh se opozita e konsideron këtë domosdoshmëri për garantimin e zgjedhjeve të lira.
“Po të jetë për opozitën, që nesër duhet të krijohet një qeveri teknike. Nuk mund të ketë zgjedhje të lira pa një qeveri teknike,” tha ai, duke nënvizuar se rasti Balluku do të vazhdojë të ketë jehonë politike. Sipas tij, kjo çështje është “një bizhu më shumë” në listën e argumenteve të opozitës për të kërkuar rotacion politik.
Gjekmarkaj shtoi se presioni ndaj qytetarëve, kontrolli mbi administratën dhe mënyra e funksionimit të pushtetit aktual krijojnë një klimë të vështirë që, sipas tij, kërkon ndërgjegjësim më të lartë shoqëror.
“Kjo nuk është situatë e lehtë. Kërkon vetëdije nga secili qytetar dhe më pas nga shoqëria si një komponent i bashkuar,” tha ai.
Lidhur me mundësinë që çështja Balluku të shërbejë si katalizator për bashkimin e forcave opozitare, Gjekmarkaj theksoi se PD mbetet e hapur ndaj çdo aktori që ndan të njëjtat kauza.
“PD është mjaft e hapur për të pranuar krah saj në betejë këdo që ndjen detyrimin për të luftuar për standarde demokratike, kundër korrupsionit, për demokraci dhe një jetë më të mirë,” deklaroi ai.
Sipas tij, bashkimi opozitar nuk mund të arrihet me imponim, por përmes maturisë dhe vetëdijes për objektivat e përbashkëta. “Kjo kërkon bashkim rreth akuzave të përbashkëta dhe mendoj se mund të arrihet në një të ardhme të afërt,” përfundoi Gjekmarkaj.
and then