“Duke mbrojtur Ballukun, Rama po bën…”, Ivi Kaso: Në BE janë pezulluar e shkarkuar ministra nën hetim

Deputeti i Partisë Demokratike, Ivi Kaso, mbajti një fjalim të ashpër gjatë protestës së sotme të opozitës përpara Kryeministrisë, ku akuzoi qeverinë Rama për kapje të shtetit, keqqeverisje dhe mbrojtje të korrupsionit në nivelet më të larta.

Kaso e nisi fjalën e tij duke sjellë në kujtesë deklaratën historike të presidentit amerikan Ronald Reagan, i cili më 1981 tha se “qeveria nuk është zgjidhja, por problemi”. Sipas tij, kjo thënie sot vlen edhe më shumë për Shqipërinë.

“Qeveria sot është halli më i madh i shqiptarëve. Nuk kemi një qeveri të popullit, prej popullit, për popullin, por një bandë kaçakësh që ndjekin urdhrat e kryekaçakut,” deklaroi ai, duke akuzuar kryeministrin se është duke varfëruar vendin dhe larguar qytetarët drejt emigracionit.

Duke iu referuar debatit për pezullimin nga detyra të Belinda Ballukut, deputeti demokrat theksoi se Rama po mashtron publikun kur thotë se ministrat nuk mund të pezullohen nga drejtësia. Ai solli shembuj nga vendet europiane, ku ministra janë pezulluar ose shkarkuar kur kanë qenë nën hetim.

“Në Rumani u pezulluan tre ministra për korrupsion. Në Itali ish-ministrja e bujqësisë u pezullua. Në Francë, dy ministra u shkarkuan në periudha të ndryshme. Kjo është e vërteta,” u shpreh Kaso.

Ai akuzoi kryeministrin Rama se duke refuzuar shkarkimin e Ballukut, në fakt po mbron vetëm veten.

“Rama e di se me arrestimin e Ballukut, më pas është radha e tij. Rama është shefi i atyre që janë nën hetim apo pas hekurave. Ose i di dhe është i korruptuar, ose nuk i di dhe është i mangët nga mendtë e kokës – në të dyja rastet duhet të ikë,” tha ai.

Kaso theksoi se Komisioni i Venecias ka një qëndrim të qartë: askush nuk është mbi ligjin, sidomos kur bëhet fjalë për vepra të rënda penale si korrupsioni. “Rama po mbron veten sepse i di pasojat. Ky njeri duhet të përgjigjet për shumë krime të tjera,” u shpreh deputeti.

Në fund të fjalimit, ai përmendi disa skandale që sipas tij lidhen direkt me kryeministrin, përfshirë tenderat e dyshimtë dhe pastrimin e parave.

“Rama duhet të përgjigjet për tenderat, për paratë që pastrohen me firmën e tij, për skandalin e rrugës Qukës–Qafë Plloçë që ka kushtuar 260 milionë euro dhe u shemb nga shiu i parë,” përfundoi Kaso.