Ceremoni plot emocion dhe ngjyra! Ndizen dritat e pemës e Vitit të Ri në disa qytete

Mbrëmja e 6 dhjetorit i solli qytetit të Korçës magjinë e festave të fundvitit.

Në një ceremoni plot emocion dhe ngjyra, qyteti ndezi dekorimet festive duke shënuar kështu nisjen zyrtare të sezonit më të dashur të vitit.
Sheshi kryesor u mbush me qytetarë e vizitorë, të cilët pritën me entuziazëm numërimin mbrapsht dhe çastin kur dritat shumëngjyrëshe ndriçuan gjithë qytetin, duke krijuar atmosferën e parë të festimeve që do të shoqërojnë Korçën gjatë gjithë dhjetorit.

Në fjalën e tij, kryebashkiaku theksoi se Korça është tashmë e rezervuar plotësisht për të gjitha ditët e festave, ndërsa është përgatitur një kalendar i pasur aktivitetesh dhe një ofertë turistike tejet konkurruese deri në natën e ndërrimit të viteve. Sipas tij, qyteti do të vazhdojë të mbetet një pikë e fortë e turizmit dimëror në vend.

Mbrëmja e ndezjes së dritave u shoqërua nga një koncert festiv që i dha edhe më shumë ngrohtësi atmosferës.
Pjesëmarrja e lartë e qytetarëve ishte tregues se Korça mbetet edhe këtë vit një nga destinacionet më të kërkuara për festat e fundvitit.

Ndërsa në Lushnjë aty ku ishte vendosur dhe pema e vitit të ri janë mbledhur qindra vogëlushë dhe qytetarë që kanë marrë pjesë në ceremoninë e ndezjes së dritave.

Atmosfera festive u shoqërua me muzikë dhe aktivitete për të vegjlit edhe në Durrës, duke shënuar nisjen zyrtare të sezonit të festave në qytet.

Sheshi kryesor u mbush me qytetarë të të gjitha moshave, të cilët përjetuan fillimin e magjisë së festave mes muzikës, dekorimeve shumëngjyrëshe dhe gëzimit të përbashkët.

Edhe në Durrës Shijak, Elbasan, Fier e Shkodër, dritat u ndezën nën ritmin e muzikës festive dhe këngëve të interpretuara nga fëmijët.