Në Premier League u zhvilluan të shtunën përballje të rëndësishme. Arsenali arriti një fitore dramatike 2-1 ndaj Wolverhamptonit në “Emirates”, falë dy autogolave. Pas një dominance të gjatë dhe shumë rasteve të krijuara, avantazhi erdhi në minutën e 70-të pas një goditjeje këndi të Bukayo Sakas, ku topi përfundoi në rrjetë pas një devijimi fatkeq të portierit Johnstone. Wolverhamptoni barazoi në minutën e 90-të me Arokodaren, por Arsenali reagoi menjëherë dhe në minutën e 94-të siguroi tre pikët me një tjetër autogol, këtë herë të Mosqueras. Me këtë sukses, Arsenali shkëputet përkohësisht në krye, ndërsa Wolverhamptoni mbetet i fundit në renditje.
Fitore të pastër shënoi edhe Liverpooli, që mposhti 2-0 Brightonin në “Anfield”. Hugo Ekitike ishte protagonisti absolut, duke shënuar të dy golat e takimit. Mohamed Salah, i futur në lojë pas dëmtimit të Joe Gomez, dha asistin për golin e dytë dhe hyri në histori, duke u bërë lojtari me më shumë kontribute direkte golash me një klub të vetëm në Premier League. Liverpooli ngjitet në kuotën e 26 pikëve, ndërsa Brightoni ndalet në 23.
Tri pikë të rëndësishme mori edhe Chelsea, që fitoi 2-0 ndaj Evertonit në “Stamford Bridge”. Cole Palmer hapi ndeshjen në minutën e 21-të, duke shënuar në rikthimin e tij para tifozëve, ndërsa Malo Gusto vulosi rezultatin në fund të pjesës së parë. Me këtë fitore, Chelsea arrin 28 pikë dhe rikthehet te suksesi pas disa javësh pauzë.
and then