Dinamo pritet të jetë aktive në merkaton e janarit, megjithëse opsionet në këtë afat kalimtar, nuk janë të shumta. Trajneri Daja i ka kërkuar drejtuesve ndërhyrje në repartin e sulmit, pavarësisht se Dinamo ka aktualisht sulmin më të mirë në Shqipëri, duke iu referuar golave që kanë shënuar.
Edhe stafi drejtues, ka premtuar se do të ketë ndërhyrje në merkato dhe fokusin kryesor, e ka reparti i sulmit teksa, edhe në repartin e mbrojtjes, mund të ketë ndërhyrje, sidomos në krahun e djathtë. Maliqi ka qenë titullar këtë sezon duke i marrë vendin Meksit, me këtë të fundit që duket se nuk është më ndër të preferuarit e trajnerit Daja. Edhe kur Maliqi ka munguar, Daja ka provuar shpesh herë eksperimente duke aktivizuar në të djathtë Teikseirën që luan si qendërmbrojtës.
Qendra është e mbipopulluar, me Ditën, Beqjen, Teikseirën, Alijin apo edhe Hoxhën që pritet të rikthehet së shpejti me skuadrën pasi po lë pas dëmtimin e pësuar më parë. Edhe në repartet e tjera, Daja ka alternativa të shumta dhe në fakt, asnjëherë nuk ka kërkuar që të ketë ndërhyrje, duke i dhënë rëndësi gjithmonë sulmit, pasi Guindo ka luajtur shpesh i dëmtuar.
LISTA E SKUADRËS- Dinamo ka dorëzuar listën e federimit në verë me 25 futbollistë, duke lënë jashtë Rustem Hoxhën, dëmtimi i të cilit pritej të zgjaste përtej fazës së parë të kampionatit. Por, me afrimin e lojtarëve të rinj në merkato, Dinamo duhet fillimisht që të bëjë ndryshime në listën e federimit dhe të lirojë vende, ku me shumë gjasa më të rinjtë në listë, mund të kalojnë me ekipet e moshave nëse mosha e tyre nuk ka kaluar.
Ndërkohë, pritet që në këtë merkato të ketë edhe ndryshime në skuadrën e Dajës dhe nuk përjashtohen lojtarët që mund të largohen, qoftë si transferime, ashtu edhe si lojtarë që nuk kanë bindur dhe që mund të kërkojnë alternativa të reja. Javët e ardhshme, do të jenë aktive në kampin blu.
KALENDARI- Dinamo do të luajë të shtunën ndeshjen e parë për vitin 2026, ku përballë do të ketë Besën e Kavajës në kuadër të Kupës së Shqipërisë. Pak ditë më vonë, blutë do të nisin fazën e tretë të kampionatit, me sfidën ndaj Teutës në transfertë.
and then