Aktivistja Edlira Çepani, e ftuar në emisionin “Studio24”, ka folur për qëndrimin e faktorit ndërkombëtar ndaj sistemit të drejtësisë në Shqipëri, pas vizitës së fundit në Kuvend të përfaqësuesve të ambasadës amerikane.
Çepani theksoi se Shqipëria historikisht ka pasur një marrëdhënie të fortë me partnerët ndërkombëtarë, të cilët kanë qenë aleatë të rëndësishëm në një rrugëtim të vështirë drejt konsolidimit të shtetit dhe demokracisë. Sipas saj, mbështetja e tyre ka qenë dhe mbetet thelbësore, veçanërisht në kontekstin e synimit për integrim në Bashkimin Evropian dhe ruajtjen e standardeve euroatlantike.
Ajo nënvizoi se për shkak të pozicionit gjeopolitik, Shqipëria ka qenë shpesh në qendër të vëmendjes ndërkombëtare, si në aspektin pozitiv ashtu edhe në atë problematik. Megjithatë, Çepani theksoi se mbështetja e ndërkombëtarëve ka një kufi dhe se forcimi i demokracisë së brendshme është përgjegjësi që i takon vetë shoqërisë dhe politikës shqiptare.
Duke u ndalur te reforma në drejtësi, Çepani e cilësoi SPAK-un si një investim të përbashkët të Shteteve të Bashkuara dhe Bashkimit Evropian, duke theksuar se ky institucion ka dhënë më shumë rezultate se çdo strukturë tjetër në 35 vitet e fundit të demokracisë në Shqipëri.
Sipas saj, mbështetja ndërkombëtare për SPAK-un është e domosdoshme, ndërsa Shqipëria ka ende nevojë për monitorim të vazhdueshëm në procese të ndryshme institucionale. Ajo shtoi se, si në planin politik ashtu edhe në atë shoqëror, vëmendja e shqiptarëve vijon të jetë e drejtuar nga ndërkombëtarët, ndërkohë që nga klasa politike pritet të ketë përballje të drejtpërdrejtë me institucionet e drejtësisë.
and then