E ardhmja e Neymar në Kupën e Botës mbetet një nga temat më të nxehta në Brazil. Trajneri i “Seleção”-s, Carlo Ancelotti, ka qenë i qartë prej muajsh: lista nuk është e mbyllur, por koha po mbaron.
Tre muaj pas deklaratës së tij të fortë, dilema vazhdon. Ancelotti po përgatit listën përfundimtare me 26 lojtarë dhe konkurrenca në repartin ofensiv është e ashpër. Në favor të Neymarit është talenti i tij i jashtëzakonshëm – në formën më të mirë, ai mbetet një nivel mbi të tjerët. Por në anën tjetër peshojnë dëmtimet dhe mungesa e vazhdimësisë këtë sezon.
Pas operacionit në fund të dhjetorit, ylli brazilian ndoqi një program të kujdesshëm rikuperimi me Santos. Klubi vendosi të mos e nxitojë kthimin e tij, duke i dhënë përparësi gjendjes fizike. Pas 70 ditësh jashtë fushës, Neymar u rikthye fundjavën e kaluar në Campeonato Paulista, duke dhënë menjëherë një asist, por edhe duke përjetuar një moment frike pas një ndërhyrjeje të fortë në minutat e para.
Në Brazil, dera mbetet e hapur. Por për të siguruar një vend në Botëror, Neymar duhet të bindë – dhe shpejt. Testi vendimtar pritet të jetë në muajin mars, gjatë miqësoreve në Shtetet e Bashkuara kundër Francës dhe Kroacisë. Deri atëherë, Ancelotti pritet të ketë pothuajse të përfunduar listën finale.
Mes shpresës dhe pasigurisë, historia mbetet e hapur: do të jetë një vallëzim i fundit i Neymarit në skenën më të madhe të futbollit botëror, apo një lamtumirë e hidhur? Përgjigjja do të vijë shumë shpejt.
and then