“Vendoset zv.drejtor i përgjithshëm i Portit të Durrësit një 24-vjeçar”/ PS refuzoi të heqë imunitetin e Ballukut, pedagogia ironi: 82 kukulla të bukura votuan kundër gjyqësorit!

Pedagogia Eneida Bozhegu ishte sot pjesë e tryezës së zhvilluar nga ish-deputeti Ervin Salianji me intelektualë në Tiranë.

Ajo u ndal në problematikat sa i përket ekzekutivit dhe ndërhyrjet që po bëhen gjithmonë e më të shpeshtë në pushtete të tjera, siç është gjyqësori. Bozhegu përmendi këtu edhe vendimin e marrë nga Kuvendi për të refuzuar heqjen e imunitetit të ish ministres Belinda Balluku pas kërkesës së SPAK për arrestimin e saj.

“Akti i parë në një shtet të së drejtës, dhe më sublimi manifestohet me institutin e dorëheqjen. 82 kukulla të bukura, njëra më e bukur e tjetra, votuan kundër një prej tre pushteteve, gjyqësorit. Pushteti politik iu kundërvu petkut të gjyqtarit dhe shqyrtuan diçka të ardhur nga pushteti paralele”, tha ajo.

Pedagogia ngriti shqetësimin gjithashtu në lidhje me rininë shqiptare dhe aftësinë që ky brez ka për të zgjedhur përfaqësuesit e tyre, për sa kohë që i nënshtrohen premtimeve për një vend pune apo gjëra të ngjashme.

“Duhet të ndikojmë në mendimin kritik të popullit, një prej pikave është edhe media. E kemi pyetur ndonjëherë veten çfarë rinie kemi të aftë të ushtrojnë të drejtën e tyre për të zgjedhur përfaqësuesit në Kuvend? Nuk dinë kë zgjedhin por ndikohen nga të tjerët, pasi i ofrohen vende pune. Kemi një 24 vjeçar zv drejtor i përgjithshëm i një porti. Mund të jetë më i miri por 24 vjeç nuk ka eksperiencë”, tha ajo.