“NDAL!”/ Tre të arrestuar për kultivim droge në Malësinë e Madhe. Ndjekje nëpër ara dhe…Pamje me dron nga operacioni

Tre persona janë arrestuar në Malësinë e Madhe në një operacion kundër kultivimit të lëndëve narkotike.

Sipas policisë, në fshatin Bajzë u konstatuan platforma polistiroli ku ishin kultivuar filiza kanabisi, me qëllim mbjelljen e tyre në tokë. Gjatë operacionit, këto filiza u asgjësuan, ndërsa një pjesë u sekuestrua si provë materiale.

Për këtë rast u arrestuan tre shtetas, familjarë mes tyre: E.Q., 29 vjeç, B.Q., 23 vjeçe dhe A.Q., 26 vjeçe, të gjithë banues në Bajzë.

Ndërkohë, në vijim të kontrolleve, në fshatin Gruemirë Çezmë u zbulua një magazinë me platforma të tjera polistiroli, ku ishin kultivuar filiza dhe fara të dyshuara narkotike.

Për këtë rast u shpall në kërkim shtetasi B.R., 52 vjeç, ndërsa nisi procedimi penal për dy shtetase të tjera, E.R., 41 vjeçe dhe Z.R., 75 vjeçe.

“Në zbatim të masave të ndërmarra në kuadër të planit operacional për parandalimin dhe goditjen që në fazë fillestare të tentativave për kultivimin e bimëve narkotike, si dhe mbi bazën e informacioneve të siguruara nga inteligjenca policore, se në fshatrat Bajzë dhe Gruemirë Çezmë disa persona po kishin mbjellë fara kanabisi në platforma polistiroli, shërbimet e specializuara në DVP Shkodër, në bashkëpunim me Komisariatin e Policisë Malësi e Madhe dhe, të mbështetura nga Forcat e Posaçme Operacionale dhe “Shqiponja”, organizuan dhe finalizuan operacionin policor të koduar “Faza e parë”.

Si rezultat i operacionit, në fshatin Bajzë, u evidentuan një numër i konsiderueshëm filizash të dyshuar kanabisi, të kultivuar në platforma polistiroli, me qëllim kultivimin e tyre në tokë.

Platformat me filiza u shkatërruan gjatë operacionit, ndërkohë që një pjesë e tyre u sekuestrua nga grupi hetimor në cilësinë e provës materiale.

Si autorë të dyshuar të kësaj veprimtarie kriminale u arrestuan shtetasit: E. Q., 29 vjeç, B. Q., 23 vjeçe dhe A. Q., 26 vjeçe (familjarë), të tre banues në fshatin Bajzë.

Po në vijim të operacionit, në fshatin Gruemirë Çezmë, në një magazinë u konstatuan edhe disa platforma të tjera polistiroli, në të cilat ishin kultivuar filiza dhe fara narkotike të dyshuara kanabisi.

Për këtë rast u shpall në kërkim shtetasi B. R., 52 vjeç, banues në fshatin Gruemirë Çezmë, dhe nisi procedimi penal për shtetaset E. R., 41 vjeçe, dhe Z. R., 75 vjeçe, banuese në këtë fshat.

Vijon puna për kapjen e shtetasit B. R., si dhe për identifikimin dhe nxjerrjen përpara përgjegjësisë penale të shtetasve të tjerë që mund të jenë implikuar në këto raste.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme”, thuhet në njoftimin e bluve.