Deputeti shqiptar Tritan Shehu ka reaguar pas zhvillimeve të fundit politike në Hungari, duke e cilësuar fitoren e opozitës së drejtuar nga Péter Magyar si një moment të rëndësishëm për orientimin evropian të vendit.
Në një deklaratë publike, Shehu u shpreh se “Hungaria votoi familjen e Evropës së Bashkuar”, duke theksuar se mesazhi pro-evropian ishte thelbësor në këtë proces zgjedhor, ku opozita ka siguruar tashmë një shumicë parlamentare të konsiderueshme dhe synon deri në dy të tretat e vendeve.
Sipas tij, fitorja e Magyar bazohet në disa shtylla kryesore politike. Ai renditi luftën kundër korrupsionit si leitmotiv të fushatës, politikat ekonomike të qendrës së djathtë me taksa të ulëta, forcimin e rolit të Hungarisë në Bashkimin Evropian dhe qëndrimin në linjat e konservatorizmit social.
Megjithatë, Shehu theksoi se elementi më i rëndësishëm që ndikoi në këtë rezultat ishte përballja me korrupsionin. “Duket se lufta kundër korrupsionit përbënte kartën më të fortë politike të Magyar,” u shpreh ai.
Ai shtoi se qytetarët janë gjithnjë e më të ndjeshëm ndaj fenomenit të korrupsionit, duke e cilësuar këtë si një faktor që ndan shoqëritë e zhvilluara nga ato që mbeten pas në proceset demokratike.
Zhvillimet në Hungari pritet të kenë ndikim jo vetëm në politikën e brendshme të vendit, por edhe në marrëdhëniet e tij me Bashkimin Evropian, në një moment kur çështjet e sundimit të ligjit dhe integrimit evropian mbeten në fokus.
and then