Milani merr një fitore shumë të rëndësishme në javën e 33-të të Serie A, duke mposhtur Veronën me rezultatin minimal 1-0 në stadiumin Bentegodi dhe duke u ngjitur në vendin e dytë në renditje.
Ndeshja u vendos në minutën e 41-të, kur Rabiot finalizoi saktë një aksion të bukur të nisur nga Leao, duke mposhtur portierin Montipò. Një gol që rezultoi vendimtar për fatin e takimit.
Në pjesën e parë, Milani provoi të marrë kontrollin e lojës, por Verona nuk u dorëzua lehtë dhe krijoi disa raste të rrezikshme. Edhe vendasit patën mundësinë e tyre më të mirë para pushimit, por Maignan reagoi në mënyrë perfekte.
Në pjesën e dytë, ritmi mbeti i lartë. Verona tentoi të rikthehej në lojë, ndërsa Milani kërkoi golin e sigurisë. Në minutën e 74-të, Gabbia gjeti rrugën e rrjetës, por goli u anulua për pozicion jashtë loje në nisje të aksionit.
Në minutat e fundit, kuqezinjtë ishin më pranë golit të dytë sesa Verona barazimit, por rezultati mbeti i pandryshuar deri në vërshëllimën përfundimtare.
Me këtë fitore, Milani shkon në kuotën e 66 pikëve dhe hedh një hap të madh drejt kualifikimit në Champions League. Ndërkohë, Verona mbetet në një situatë shumë të vështirë, gjithnjë e më pranë rënies nga kategoria.
Pas ndeshjes, Allegri, edhe pse i pakënaqur me paraqitjen në Bentegodi, u shfaq i kënaqur me rezultatin dhe praktikisht konfirmoi qëndrimin e tij në stolin e Milanit:
“Deri në këtë moment nuk kam marrë asnjë telefonatë. Kam nisur një rrugëtim me Milanin dhe synimi është ta vazhdoj – deklaroi trajneri toskan. Mendja ime është vetëm këtu. Sa i përket Leaos? Rafa bëri një ndeshje të mirë dhe dha një asist shumë të bukur. Pastaj e zëvendësova sepse kisha nevojë për diçka tjetër. Në ndeshjet e mbetura, të gjithë duhet të ndihen të rëndësishëm, edhe ata që luajnë më pak.”
and then