Banesa u përfshi nga flakët dhe u evakuuan 12 familje / Arrestohet 20-vjeçari, autor i dyshuar. Policia jep detaje si nisi zjarri

Policia e Fierit ka arrestuar një 20-vjeçar, i cili dyshohet se është autori i zjarrit masiv që përfshiu fshatin Drizë dhe disa fshatra përreth, duke shkaktuar dëme materiale dhe rrezikuar banesat e dhjetëra banorëve.

Sipas njoftimit zyrtar, në pranga ka rënë shtetasi me iniciale N. J., banues në Drizë. Nga hetimet rezulton se më 5 korrik 2026 ai kishte ndezur zjarr në tokën në pronësi të babait të tij për të djegur disa barishte, por flakët dolën jashtë kontrollit dhe u përhapën me shpejtësi në një sipërfaqe të madhe.

Për shkak të rrezikut nga zjarri, Policia evakuoi 12 familje, banesat e të cilave u kërcënuan nga përhapja e flakëve.

Falë ndërhyrjes së menjëhershme të Policisë, shërbimeve zjarrfikëse, grupeve të Forcës Kombëtare të Sigurisë (FKS) – Njësia Fier, si dhe helikopterëve të Forcave të Armatosura, zjarri u vu nën kontroll dhe u shua pa shkaktuar humbje në jetë.

Njoftimi i policisë:

Ndezi zjarr në tokën në pronësi të babait të tij, në fshatin Drizë, por flakët dolën jashtë kontrollit dhe u përhapën në territorin e disa fshatrave, reagimi në kohë i Policisë çoi në identifikimin dhe arrestimin në flagrancë të autorit të dyshuar të zjarrvënies.

Në vijim të veprimeve hetimore për zbardhjen e rrethanave të zjarrit të rënë në fshatin Drizë, Fier, specialistët për Hetimin e Krimeve në Komisariatin e Policisë Fier arrestuan në flagrancë autorin e dyshuar, shtetasin N. J., 20 vjeç, banues në Drizë.

Ky shtetas dyshohet se, më datë 05.07.2026, në tokën në pronësi të babait të tij, ka ndezur zjarr për djegien e disa barishteve, por flakët kanë dalë jashtë kontrollit, duke përfshirë një sipërfaqe të madhe në fshatin Drizë dhe në fshatrat përreth, ku u shkaktuan dëme materiale.

Shërbimet e Policisë evakuuan 12 familje, banesat e të cilave u rrezikuan nga përhapja e flakëve.

Falë ndërhyrjes së menjëhershme të forcave të Policisë, shërbimeve zjarrfikëse, grupeve të Forcës Kombëtare të Sigurisë (FKS) – Njësia Fier, si dhe helikopterëve të Forcave të Armatosura, u bë e mundur shuarja e flakëve, pa pasoja për jetën e qytetarëve.

Drejtoria Vendore e Policisë Fier apelon për kujdes maksimal nga qytetarët, duke i ftuar të mos ndërmarrin veprime që mund të shkaktojnë zjarrvënie, pasi do të përballen me ligjin.

Gjithashtu, fton qytetarët të denoncojnë çdo rast paligjshmërie në numrin 112, duke u garantuar anonimat dhe reagim të menjëhershëm.