Java e gjashtë e kampionatit Abissnet Superiore solli pesë përballje me rezultate të rëndësishme, ku spikati fitorja e Tiranës në derbin ndaj Partizanit. Teuta dhe Egnatia bindën, duke siguruar secila tri pikët në këtë raund, ndërsa Vllaznia fitoi minimalisht ndaj Dinamo City. Në barazim u mbyll sfida mes AF Elbasanit dhe Vorës.
Tirana triumfon 3-1 në derbi ndaj Partizanit
Derbi mes Partizanit dhe Tiranës ishte kryendeshja e javës së gjashtë dhe u mbyll me fitoren 3-1 të bardhebluve.
Tirana kaloi në avantazh që në minutën e 7-të me Xhixhën, duke e nisur ndeshjen me ritëm të lartë. Partizani reagoi dhe barazoi në minutën e 36-të me Himallarin, duke rikthyer ekuilibrin para pushimit.
Në pjesën e dytë, bardheblutë gjetën golin e avantazhit në minutën e 79-të me Ilievskin. Vetëm gjashtë minuta më vonë, Kish shënoi nga pika e bardhë e penalltisë, duke vulosur fitoren 3-1 të Tiranës në derbin kryeqytetas.
Ky rezultat i jep Tiranës tri pikë të rëndësishme, ndërsa Partizani mbetet me 4 pikë pas gjashtë javësh kampionat.
Egnatia fiton në Laç
Egnatia mori një fitore të rëndësishme në transfertë, duke mposhtur Laçin me rezultatin 2-0. Pas një ndeshjeje të luftuar, skuadra rrogozhinase zhbllokoi rezultatin në minutën e 81-të me Loukili. Në minutën e 89-të, Diabate shënoi golin e dytë, duke siguruar tri pikët për Egnatian.
Me këtë sukses, Egnatia ngjitet në kuotën e 15 pikëve dhe vijon të qëndrojë në vendin e dytë, vetëm një pikë pas Teutës.
Vllaznia mposht Dinamo City
Vllaznia siguroi tri pikët përballë Dinamo City, duke fituar me rezultatin minimal 1-0. Goli vendimtar u shënua nga Murataj në minutën e 31-të, duke i dhënë skuadrës shkodrane një fitore të rëndësishme në këtë javë.
Nga ana tjetër, Dinamo City mbetet në kuotën e 12 pikëve, ndërsa Vllaznia shkon në 5 pikë pas gjashtë javësh.
Barazim mes AF Elbasanit dhe Vorës
AF Elbasani dhe Vora ndanë nga një pikë, pas barazimit 1-1. Vendasit kaluan në avantazh në minutën e 22-të me Mazarin, por Vora reagoi në fundin e pjesës së parë, kur Karrica barazoi në minutën e 45’+4’.
Pas këtij rezultati, AF Elbasani dhe Laçi janë të dyja me nga 7 pikë, ndërsa Vora shkon në 5 pikë.
Teuta mposht Skënderbeun dhe merr kreun
Teuta fitoi 2-0 ndaj Skënderbeut në shtëpi, duke konfirmuar formën e mirë në këtë fillim sezoni. Kallaku zhbllokoi rezultatin në minutën e 16-të, ndërsa Martelo dyfishoi shifrat në minutën e 32-të.
Me këtë fitore, Teuta arrin në 16 pikë dhe kryeson e vetme renditjen e Abissnet Superiore pas gjashtë javësh. Skënderbeu, nga ana tjetër, mbetet në fund të tabelës me 3 pikë.
and then