Veç Tiranës dhe Flamurtarit, dy skuadra të tjera nuk e kanë emëruar ende trajnerin. Bëhet fjalë për Teutën dhe Bylisin. Nëse te këta të fundit, grupi i lojtarëve ekziston, në Durrës situata është pak më ndryshe. Ende nuk dihet se cilët janë drejtuesit e skuadrës, trajneri dhe lojtarët.
Një enigmë e madhe që po mbulon durrsakët. Thënë shkurt, në këtë moment që flasim janë katër skuadra, të cilat nuk kanë emër për stolin, Teuta, Tirana, Bylisi dhe Flamurtari ose 40% e gjithë Superiores është në ajër.
ÇYRBJA – Pas përfundimit të sezonit, Teuta arriti objektivin për të qëndruar në Superiore edhe për një sezon. Në një intervistë për “Panorama Sport” ka folur mesfushori i Teutës, Arbër Çyrbja, i cili ka analizuar këtë sezon të ekipit blu. Çyrbja shprehet se, pavarësisht arritjes së objektivave, në fund Teuta ka treguar që është ringritur gjithmonë.
“Në përgjithësi do thosha një sezon deri diku i mirë, duke marrë parasysh situatën ku ishim. Jam i lumtur që arritëm të marrim maksimumin në përballjet direkte dhe në fund ishim të qetë, pasi siguruam gjithçka me ‘këmbët tona’. Grupi aktual duhet të ruhet dhe me disa përforcime cilësore në të tria repartet mendoj se Teuta sezonin e ri do të jetë pretendente për lart. Kam besim te stafi drejtues, sepse e kanë kapacitetin dhe eksperiencën të ndërtojnë një ekip fitues.
Momentet jo të këtij sezoni nuk janë vetëm përgjegjësi e repartit të mbrojtjes, por e gjithë skuadrës. Sigurisht që në shumë ndeshje jemi ndëshkuar për gabime teknike të lojtarëve, por përgjegjës për dështimin është i gjithë ekipit. Besoj shumë në aftësitë e stafit për të ndërtuar një skuadër fituese në sezonin e ri. Teuta dhe herë të tjera ka qenë në këto pozita, por është kthyer më e fortë”, mbylli lojtari i Teutës, Arbër Çyrbja.
and then