EKSKLUZIVE/ Nuk është paraqitur as në stërvitjet e skuadrës, mbrojtësi drejt largimit nga Kukësi

Shumë prej lojtarëve të Kukësit pritet të mos jenë pjesë e skuadrës për edicionin e ardhshëm dhe njëri prej tyre në prag divorci është pikërisht mbrojtësi i krahut të majtë, Emiljano Musta.

Lojtari që nisi sezonin me Partizanin dhe u rikthye te verilindorët në merkaton e janarit, me shumë gjasa do ta mbyllë më shpejt nga sa pritej aventurën me këtë skuadër.

Në dy ndeshjet e fundit, elbasanasi nuk është grumbulluar nga trajneri Diego Longo, pikërisht në takimet me Vllazninë dhe Dinamon.

Nga klubi nuk raportohet për ndonjë dëmtim të mbrojtësit dhe arsyet e tij janë teknike, me italianin që nuk e sheh më si të domosdoshëm për skuadrën e tij, paçka se ka bërë elozhe pa fund në momentin që Musta u afrua te Kukësi.

Lojtari pritet të mungojë edhe ndaj Skënderbeut këtë të shtunë, duke bërë që rrugët të ndahen përfundimisht.

“Panorama Sport”mëson se Musta nuk është parë as në stërvitjet e ditëve të fundit.

Në një situatë të tillë, duket se palët janë drejt zgjidhjes me konsensus të marrëveshjes.

30-vjeçari mund të cilësohet si largimi i radhës nga verilindorët pa u mbyllur sezoni, pasi më herët ndërpreu bashkëpunimin edhe mesfushori Ardit Hila.

PRAPASKENAT

Mungesa e Mustës në dy ndeshjet e fundit nuk ka kaluar pa u vënë re, sepse bëhet fjalë për një lojtar kyç në ekipin e Kukësit, i cili erdhi në kampin verilindor për të qenë titullar.

Mirëpo, ka mjaftuar vetëm një postim i Ardit Hilës në rrjetet sociale, së bashku me Mustën, me këtë të fundit që e ka rishpërndarë, për të sjellë një nevrikosje të Longos, i cili e ka marrë si provokim ndaj tij.

Që nga ajo kohë marrëdhëniet u ftohën dhe italiani nuk ka preferuar as ta mbajë në pankinë Mustën, por e ka dërguar në tribunë.

Gjatë këtyre ndeshjeve, elbasanasi është preferuar shpesh në rolin e sulmuesit të krahut, duke mbuluar boshllëqet që trajneri kishte në organikë në fazën ofensive.

Megjithatë, ndeshja me Vllazninë duket se i vuri vulën edhe largimit dhe tani mbetet vetëm konfirmimi nga palët për ndërprerjen e bashkëpunimit, i cili zgjati vetëm pesë muaj.

Për të përforcuar këtë gjë, Musta mungoi edhe në përballjen ndaj Dinamos, duke konfirmuar një krisje mes palëve.

30-vjeçari është pëlqyer shumë nga Longo në fillim, pasi mund të bënte disa role, por me kalimin e kohës gjërat ndryshuan.

VLADIMIR MEMA – Arena e Lajmit