PSG-Bayern Munich rezultoi një sfidë spektakolare, një ndeshje për tifozë me zemër të fortë, një ndeshje që shkroi historinë e Champions, pa diskutim një nga ndeshjet më të bukura të këtij kompeticioni. E besoni apo jo, por në “Parkun e Princave” u realizuan 9 gola, u thyen rekorde të pa dëgjuar më parë, në fund festoi PSG falë suksesit 5-4, por Bayern Munich mbetet “gjallë”, tani në “Allianz Arena” do të luajnë “all-in”, i duhet të fitojnë me çdo kusht për të synuar finalen e madhe. Dy ekipet zhvilluan një futboll të hapur sulmues, një futboll total, ku rëndësi kishte vetëm cili realizonte më shumë.
Bayern tronditi Parisin në minutën e 17-të ku Luis Diaz fitoi një 11-metërsh. Nga pika e bardhë, Harry Kane u tregua perfekt duke kaluar Bayern në avantazh. PSG reagoi fuqishëm ku në minutën e 24-të, Kvaratskhelia me një aksion personal realizoi një super gol duke barazuar shifrat në 1-1. Jo vetëm kaq, por në minutën e 33-të, ai që më pak pritej, Neves me një goditje me kokë brenda në zonë dërgoi sërish topin në rrjetë duke bërë që tifozët në stadium të shpërthenin në festë. Bayern iu përgjigj me lojtarin e momentit, Olise, me francezin që depërtoi deri në zemër të mbrojtjes dhe me një goditje të fortë tundi rrjetën duke barazuar shifrat në 2-2. Pjesa e parë dhe emocionet nuk kishin fund në Paris, pasi në limite, ekipi i Luis Enriques fitoi një 11-metërsh për prekje të topit me dorë nga Davies, një vendim i kontestuar i marrë vetëm pas gjyqtari rishikoi pamjet në VAR. Nga pika e bardhë, Dembele u tregua i saktë duke rikthyer edhe një herë PSG në avantazh.
Spektakli dhe golat nuk kishin fund pasi dy ekipet nuk e ulën ritmin as në fraksionin e dytë. Në minutën e 56-të, Hakimi futi një top në zonë, aty ku Kvartskhekia me një goditje kirurgjikale realizoi golin e dytë personal dhe të katërtin për PSG. Me Bayern në shok, francezët përfituan dhe në aksionin pasues, pas vetëm dy minutash, Dembele kapi Neuer në kundra kohë duke dërguar shifrat në 5-2. Për çdo ekip kjo do të ishte një goditje fatale, por jo për Bayern, me ekipin e Kompany që reagoi fuqishëm. Në të 65-tën, Upamecano me kokë, i shërbyer nga Kimmich devijoi topin mjaftueshëm duke ngushtuar shifrat në 5-3. Bayern nuk u mjaftuan me kaq, por tre minuta më vonë, Harry Kane dhuroi një asist fantastik për Luis Diaz, me kolumbianin që fillimisht kontrolloi topin në mënyrë fantastike dhe me një goditje të saktë dërgoi topin në rrjetë. Festa nuk ishte e plotë, pasi fillimisht anësori anuloi gjithçka për pozicion jashtë lojë, por me ndihmën e VAR gjyqtari e konsideroi të rregullt duke bërë që shifrat të shkonin në 5-4 në minutën e 68-të.
Ritmi dhe golat ishin të pabesueshme, e të mendosh që ishte vetëm minuta e 68-të, por pjesa e mbetur e ndeshjes nuk solli më ndryshim në rezultat, vetëm disa raste të tjera, duke bërë që fati i këtij takimi magjik tani të vendoset në “Allianz Arena”.
and then