Qëlloi me armë zjarri në ajër në Tiranë, ku u lëndua një person, identifikohet autori i dyshuar

Policia e Tiranës ka shpallur në kërkim një 45-vjeçar, i cili akuzohet se qëlloi me armë zjarri në ajër, ku për pasojë një person u lëndua. Burime zyrtare bënë me dije se bëhet fjalë për shtetasin me inicialet Xh.XH.

NJOFTIMI I POLICISE
Identifikohet dhe shpallet në kërkim një 45-vjeçar, i cili dyshohet se ka qëlluar me armë zjarri në ajër, ku mbeti i dëmtuar lehtë një shtetas.

Shërbimet e Komisariatit të Policisë Nr. 4, pas njoftimit të marrë se rreth orës 03:30, në rrugën “Selaudin Zorba”, një shtetas kishte qëlluar me armë zjarri në ajër, organizuan menjëherë punën dhe shkuan në vendngjarje, për të sqaruar rrethanat dhe autorësinë e rastit.

Si rezultat i veprimeve të para hetimore, u bë i mundur identifikimi i autorit të dyshuar, shtetasit Xh. Xh., 45 vjeç, i cili u shpall në kërkim dhe vijon puna për lokalizimin dhe kapjen e tij.

45-vjeçari, dyshohet se pas një konflikti për motive të dobëta ka qëlluar me armë zjarri në ajër. Si pasojë në afërsi të vendit të ngjarjes ndodhej shtetasi M. G., 37 vjeç, i cili ka mbetur i dëmtuar lehtë. Materialet procedurale iu referuan Prokurorisë, për veprime të mëtejshme.