Barcelona rikthehet te fitorja në mënyrën më bindëse, duke shkatërruar Alavesin me rezultatin e thellë 6-1 në Camp Nou. Pas dy humbjeve radhazi mes kampionatit dhe Champions League, skuadra e Hansi Flick jep një sinjal të fortë reagimi, duke dhuruar spektakël ofensiv dhe konfirmuar potencialin e saj në repartin e sulmit.
Protagonistët kryesorë janë Raphinha dhe Lamine Yamal, të cilët realizojnë nga dy gola secili. Braziliani zhbllokon rezultatin, ndërsa më pas në listën e golashënuesve regjistrohen edhe Fermin Lopez dhe Lamine Yamal, duke e mbyllur pjesën e parë me një avantazh të thellë për katalanasit.
Në fraksionin e dytë, Yamal plotëson dopietën personale në minutën e 64-t, ndërsa Gordon thellon shifrat në 6-0, në minutën e 81-të. Alaves arrin të shënojë vetëm golin e nderit me Marian Diazin, por pa ndryshuar fatin e takimit. Përfundimisht 6-1 për Barcelonën, që ngjitet në kuotën e 30 pikëve dhe regjistron plot 46 gola të shënuar në kampionat, me një mesatare mbresëlënëse prej më shumë se katër golash për ndeshje.
Ndërkohë, vazhdon seria pozitive e Atletico Madridit, që regjistron fitoren e shtatë radhazi në La Liga. Skuadra e Simeones triumfon 2-0 në transfertë ndaj Levantes, me nga një gol në çdo pjesë, falë realizimeve të Grimaldos dhe Giovanni Simeones. Falë këtij suksesi skuadra madrilene ruan vendin e 2 edhe pas javës së 11 në La Liga me vetëm 2 pikë më pak se sa Barça kryesuese.
and then