Sulmuesi vlerëson ekipin, Camaj: Gati të shënoj për Egnatian, besoj te ky grup

Janë pak futbollistët shqiptarë të Malit të Zi, të cilët kanë bërë emër dhe paraqitje dinjitoze. Një ndër ata është edhe ish-sulmuesi i Deçiçit, ekip shqiptar i Tuzit, që madje po garon në Europë, Ilir Camaj. Ai u afrua ndër të parët në merkaton e Egnatias duke besuar te vlerat e tij. Tashmë pas dy javësh në kampin rrogozhinas, ai e ka një ide të qartë mbi forcën e grupit. Në intervistën për “Panorama Sport”, ai është koshient se prej tij priten gola të shumtë ai e premton këtë gjë para tifozëve të Egnatias.

Keni refuzuar disa oferta për të pranuar atë të Egnatias?

Po, është e vërtetë që pas paraqitjeve të mia në kampionatin malazez, erdhën disa oferta sapo u mbyll sezoni. Të gjithë shqiptarët që luajnë jashtë Shqipërisë kanë dëshirë të bëhen pjesë e Superiores dhe kështu pranova me dëshirë ofertën që më erdhi. Jam i kënaqur për zgjidhjen që bëra.

Sa e keni ndjekur Superioren shqiptare dhe sa e njihni atë?

Superioren e kam ndjekur sa kam pasur mundësi. Nuk mund të them se e njoh mirë, por me ndihmën e sugjerimet e shokëve, kam bindjen se do të përshtatem shpejt me kampionatin shqiptar.

Ju vjen keq që nuk shënuat në premierë, pikërisht në miqësoren me Strugën?

Natyrisht, nuk e fsheh se më erdhi keq që nuk arrita të shënoja. Fundja, si sulmues përpiqem e dua të shënoj në çdo sfidë, qoftë miqësore apo zyrtare. Po duhet të më kuptoni se ishte hera e parë që luanim bashkë dhe natyrisht ende nuk njohim mirë lojën e njëri-tjetrit.

Atëherë më kaq ditë tek Egnatia, keni krijuar ndonjë ide mbi forcën e grupit?

Grupi po më lë përshtypje shumë të mirë në marrëdhëniet në stërvitje e jashtë saj. Jemi ekip i ri ku futbollistët luajnë për herë të parë me njëri-tjetrin. Çmoj mjaft cilësitë që kam parë te shokët dhe ajo që na nevojitet, harmonizimi i grupit, do të vijë normalisht. Besoj se do të jemi një ekip konkurrent e cilësor

Sa gola premtoni?

Tifozët presin nga unë së pari ta ndihmoj ekipin, po sigurisht edhe golat e mi. Askush nuk premton numër golash, por ajo që premtoj unë është dëshira ime dhe të djersij fort për të shënuar sa më shumë gola.

F. FERIZAJ-Arena e Lajmit