Hidhet në erë makina në Shkozet, dyshohet për atentat me eksploziv. Ja kujt i përkiste (Video)

Hidhet në erë një automjet në Shkozet. Mjeti dyshohet se i përket shtetasit Aldi Mustafa.

Gazetarja Klodiana Lala e cila ka siguruar dhe pamjet nga shpërthimi, raportoi për “BalkanWeb” se ngjarja ka ndodhur në orën 13:56 në Shkozet dhe nga pamjet duket se makina e zezë ka pësuar dëmtime të mëdha. Nuk dihet ende nëse në makinë ka qenë vetë Aldi Mustafa apo makinën e kishte në përdorim dikush tjetër. Policia nuk ka informacion zyrtar ende.

Aldi Mustafa, 37 vjeç, banues në Durrës, nuk është një emër i panjohur për policinë. Ai rezulton i dënuar më parë për veprat penale “Kanosja” dhe “Prodhimi dhe shitja e narkotikëve”, me 10 vite burg, në Gjermani.

Mësohet se Mustafa më herët ka qenë anëtar i një bande të njohur në Durrës, ndërsa ka pasur lidhje me ‘Rrumin’, një personazh i njohur dhe i përfolur në ngjarje kriminale, siç ishte dhe atentati ndaj ish-prokurorit Arjan Ndoj.

Mustafa u arrestua më 30 gusht 2021 në kuadër të operacionit të koduar ‘Misioni’, bashkë me dy të tjerë, Uran Zykën, 40 vjeç, banues në Durrës, i dënuar më parë për veprën penale “Kanosja”, si dhe Tahir Gjinikën, 33 vjeç, banues në Durrës.

Tre të ndaluarit dyshohet se do kryenin një vrasje, kundrejt pagesës.