Po jeton ëndrrën e tij në një vend të panjohur. Volejbollisti Gonzalo Lapera vjen në Shqipëri për të luajtur sezonin e dytë me skuadrën e Tiranës, pasi ka qenë lojtar kyç në sukseset e bardhebluve në sezonin e kaluar, tashmë ai po përgatitet të luajë në kompeticionet europiane.
Në fillimet e tij, Lapera spikati në kombëtaren e Argjentinës, duke shkëlqyer në marrjen e medaljes së argjendtë në Lojërat Olimpike për të Rinj në Singapor në vitin 2010. Më pas, ai u fokusua te studimet, por duke vazhduar të ishte protagonist i garave kombëtare të volejbollit në Argjentinë. Që nga viti i kaluar iu dha mundësia për të luajtur jashtë vendit dhe pas dy tentativave ia doli ta realizojë atë në Shqipëri, një vend që aspiron të hyjë në nivelin e lartë europian.
Lapera tashmë rikthehet për të kontribuar në sfidën e tij më të madhe historike, ku do të ketë mundësinë të luajë edhe në Kupat e Europës, në “CEV Challenge Cup”, aty ku bardheblutë do të përballen në raundin e parë me sllovakët e Rieker Ujs Komarno. 29-vjeçari ka rrëfyer për mediat argjentinase eksperiencën shqiptare dhe pritshmëritë për edicionin e ri.
PËR MË SHUMË PËRVOJË – “Unë do të luaj në të njëjtin ekip që isha në sezonin e kaluar, por ndryshimi është se këtë herë jam bashkuar që në fillim të sezonit, ndaj jam shumë i lumtur për këtë edhe për faktin se u kualifikuam për të luajtur në Kupën e Europës”, shprehet fillimisht Lapera. Kontrata e re e argjentinasit do të zgjasë për tetë muajt e sezonit, me volejbollistin që do të mbrojë ngjyrat bardheblu në aktivitetet kombëtare në vendin tonë, në eventet mbarëkombëtare Shqipëri-Kosovë, plus mundësinë emocionuese për të avancuar në Kupën CEV.
“Nuk është një nga ligat më të forta në planet, por më pëlqen opsioni për të luajtur jashtë vendit. Dua të përfitoj nga ky sezon i ri, sidomos duke ditur që do të luaj në Kupat e Europës, ku ka skuadra më të forta, për të vazhduar të shtoj më shumë eksperiencë jashtë vendit”, deklaron Gonzalo, lojtar i dalë nga klubi Libertador San Martin në Argjentinë.
PIONIER NË SHQIPËRI – Përveç statistikave të mira në çdo skuadër që ka shkuar, Gonzalo Lapera ka edhe një shenjë: është argjentinasi i parë që luan në Ligën shqiptare. “Që kur erdha, te Tirana më bënë të ndihesha pjesë e ekipit dhe në fushë kisha një rol drejtues. Isha pjesë e rëndësishme e skuadrës në fitoren e kampionatit, sukses që nuk ishte arritur prej 28 vitesh në klub”, thekson Lapera, i cili vijon: “Ne gjithashtu gjatë edicionit të kaluar fituam të pesë kupat në të cilat morëm pjesë, kështu që këtë vit shpresoj se do të arrijmë në finale”.
KUPAT E EUROPËS, TRAMPOLINË – “Sa i përket Kupës së Europës, ne kemi pritshmëri për të kaluar në raundin e dytë”, u shpreh i emocionuar ai. Pikërisht, pjesëmarrja në “CEV Challenge Cup” mund të jetë kompeticioni që e katapulton drejt objektivave të tjerë në Kontinentin e Vjetër. “Gjithmonë kam dashur të bëj një test si ky. Vite më parë isha i fokusuar te studimet dhe te puna, por dyert u hapën në kohën e duhur. Dëshira ime është të vazhdoj të luaj jashtë vendit, të njoh vendet dhe të punoj në atë që më pëlqen, në volejboll”, deklaron 29-vjeçari.
ARTIN LLESHAJ – Arena e Lajmit
NDIQE LIVE “PANORAMA TV”
and then