Një ngjarje e rëndë është regjistruar mbrëmjen e 24 shtatorit në qytetin e Durrësit, ku një automjet ka përplasur qëllimisht një kalimtar, duke e lënë atë në gjendje të rëndë shëndetësore dhe më pas është larguar nga vendi i ngjarjes.
Ngjarja ka ndodhur rreth orës 19:54, në rrugën “Vala e Detit”, ku një automjet tip “Mercedes-Benz” ka goditur rëndë shtetasin A. K., alias B. K., 55 vjeç, banues në Durrës. Pas përplasjes, drejtuesi i mjetit është larguar menjëherë, duke braktisur viktimën në vendin e ngjarjes.
Shërbimet e Policisë Rrugore dhe të Krimeve të Rënda të Drejtorisë Vendore të Policisë Durrës kanë ndërhyrë duke nisur hetimet për zbardhjen e ngjarjes dhe identifikimin e autorit. Pas veprimeve intensive hetimore, është bërë i mundur identifikimi i drejtuesit të mjetit si shtetasi A. B., 40 vjeç, lindur dhe banues në Shijak.
Sipas Policisë, nga të dhënat e mbledhura dyshohet se përplasja nuk ka qenë aksidentale, por një tentativë për vrasje me paramendim, e kryer përmes automjetit. Si pasojë, 40-vjeçari A. B. është shpallur në kërkim dhe ndaj tij është ngritur akuza për veprën penale “Vrasja me paramendim”, mbetur në tentativë.
Policia vijon kërkimet për lokalizimin dhe arrestimin e autorit, si dhe për gjetjen dhe sekuestrimin e mjetit të përdorur në ngjarje.
Ndërkohë, 55-vjeçari i plagosur është transportuar në spitalin e Traumës në Tiranë për trajtim më të specializuar dhe ndodhet në gjendje të rëndë për shkak të plagëve të marra.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për vijimin e hetimeve dhe ndjekjen penale të autorit.
© BalkanWeb
and then