Policia e Tiranës ka finalizuar operacionin e koduar “Catch 4”, me qëllim lokalizimin dhe arrestimin e shtetasve të shpallur në kërkim për vepra të ndryshme penale. Si rezultat, janë kapur dhe vënë në pranga 4 persona të dënuar me burgim nga gjykatat e vendit.
Operacioni është zhvilluar nga strukturat e Drejtorisë Vendore të Policisë Tiranë, në bashkëpunim me Forcën e Posaçme Operacionale dhe komisariatet e policisë të Tiranës dhe Krujës.
Të arrestuarit janë:
Xh. H., i shpallur në kërkim nga autoritetet gjyqësore, pasi Gjykata e Durrësit e ka dënuar me 4 vjet burgim për veprën penale “Mashtrimi”.
Y. S., 50 vjeç, i dënuar nga Gjykata e Tiranës me 4 muaj e 1 javë burgim, për veprën penale “Largim i të burgosurit nga vendi i qëndrimit”.
B. K., 32 vjeç, i ndaluar nga specialistët për Hetimin e Krimit në Komisariatin e Policisë Krujë, pasi ishte dënuar nga Gjykata e Tiranës me 1 muaj burgim, për veprën penale “Drejtim i automjetit në mënyrë të parregullt”.
R. A., 36 vjeç, i ndaluar nga Policia Rrugore e Tiranës, gjithashtu i dënuar me 1 muaj burgim për të njëjtën vepër penale: “Drejtimi i automjetit në mënyrë të parregullt”.
Të gjitha materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
© BalkanWeb
and then