Denoncimi i PD: Qytetari i sëmurë endet prej vitesh nëpër institucione, shteti nuk i jep pagesën e invaliditetit që i takon

Partia Demokratike ka publikuar një rast, ku një qytetar denoncon se prej vitesh po përballet me një padrejtësi flagrante nga institucionet shtetërore.

Zëdhënësja e Antikorrupsionit në PD, Genta Vangjeli, në një deklaratë nga selia blu, deklaron se pavarësisht se qytetari i ka dorëzuar të gjitha dokumentet pas diagnostikimit me Stemi lateral dhe sëmundje të tjera shoqëruese, nuk ka marrë asnjë pagesë, edhe pse plotëson kushtet ligjore për të përfituar të ardhura për invaliditet.

Deklarata:

Partia Demokratike përcjell sot shqetësimin e qytetarit Arben Kalemaj, i cili denoncon se prej vitesh po përballet me një padrejtësi flagrante nga institucionet shtetërore.

Kalemaj është i diagnostikuar me Stemi lateral dhe sëmundje të tjera shoqëruese.

Bazuar në diagnozën, trajtimin mjekësor dhe pasojat funksionale të evidentuara edhe pas rehabilitimit multidisiplinar, shërbimi i kardiologjisë pranë QSUNT, më 9 maj 2022, e ka referuar rastin e tij në Komisionin Mjekësor të Caktimit të Aftësisë për Punë për vlerësimin e të drejtës së përfitimit të ndihmës ekonomike për invaliditet.

Më 5 tetor 2022, ky komision, me vërtetimin nr. 2753, ka konfirmuar se Arben Kalemaj plotëson kushtet ligjore për të përfituar të ardhura për invaliditet.

Megjithatë, pavarësisht dorëzimit të të gjithë dokumentacionit të kërkuar, zoti Kalemaj denoncon se deri sot nuk ka përfituar asnjë pagesë, duke u sorollatur për vite me radhë në dyert e institucioneve shtetërore, pa asnjë rezultat konkret. Sipas tij, asnjë zyrtar nuk ia mohon këtë të drejtë, por as nuk e ekzekuton atë.

Zoti Kalemaj ka paraqitur ankesë edhe pranë platformave elektronike të ngritura nga Kryeministri, por sërish nuk ka marrë asnjë zgjidhje.

Partia Demokratike kërkon ekzekutimin e menjëhershëm të ligjit nga administrata shtetërore dhe trajtimin me dinjitet të qytetarëve që kanë të drejtë të përfitojnë mbështetje.

Pse duhet që një qytetar i sëmurë dhe i pamundur t’i drejtohet Partisë Demokratike për të marrë një të drejtë që ia garanton ligji?

Kjo situatë tregon edhe një herë se propaganda e rreme e Edi Ramës me platformat elektronike nuk shërben për zgjidhjen e halleve të qytetarëve, por për t’i fshehur ato.

Qeveria duhet të jetë në shërbim të qytetarëve.

por Qeveria e Edi Ramës ka zgjedhur të funksionojë për të kundërtën.

Partia Demokratike do të vijojë të denoncojë çdo rast abuzimi dhe të mbrojë të drejtat e qytetarëve të pambrojtur.