Botërori 2026 tashmë është i kompletuar: Kongo dhe Iraku janë dy kombëtaret e fundit që sigurojnë kualifikimin, pas sfidave dramatike në playoff.
Le të nisim nga Guadalajara, ku Republika Demokratike e Kongos shkruan historinë. Afrikanët mposhtin 1-0 Xhamajkën vetëm pas kohës shtesë dhe rikthehen në një Botëror pas më shumë se 50 vitesh. Pas 90 minutash pa gola, vendos gjithçka Tuanzebe në minutën e 100-të, duke shfrytëzuar një goditje nga këndi. Një gol që vlen një biletë për në Kupën e Botës dhe që rikthen Kongon në elitën e futbollit botëror, pas pjesëmarrjes së vetme në vitin 1974, kur njihej si Zaire. Në fazën e grupeve, i pret një sfidë e vështirë në Grupin K, përballë Portugalisë, Kolumbisë dhe Uzbekistanit, me debutimin kundër portugezëve më 17 qershor.
Nga ana tjetër, emocione edhe në Monterrey, ku Iraku rikthehet në skenën botërore pas 40 vitesh. Skuadra aziatike mposht 2-1 Bolivinë në një ndeshje të luftuar. Fillimi është i shkëlqyer për irakianët, që kalojnë në avantazh që në minutën e 10-të me Al Hamadi, pas asistit të Al Ammari. Bolivia reagon dhe barazon në minutën e 38-të me Paniagua, duke mbyllur pjesën e parë në ekuilibër.
Në pjesën e dytë, vendimtare rezultojnë zëvendësimet: hyrja e Farji dhe Ismaael i jep ritëm të ri Irakut dhe pikërisht nga këmbët e Farji vjen asistimi për golin e fitores, i realizuar nga Hussein në minutën e 53-të. Bolivia përpiqet deri në fund, por nuk arrin të shmangë eliminimin.
Iraku siguron kështu një vend në Grupin I, ku do të përballet me Francën, Norvegjinë dhe Senegalin. Debutimi do të jetë kundër norvegjezëve në natën mes 16 dhe 17 qershorit.
Me këto dy kualifikime, tabloja e 48 skuadrave pjesëmarrëse në Botërorin 2026 është tashmë e plotë dhe gjithçka është gati për një spektakël global.
and then