Një rast shqetësues ka ngritur alarmin në disa vende të Evropës, duke tronditur besimin ndaj produkteve të destinuara për më të vegjlit. Autoritetet austriake kanë zbuluar praninë e një substance toksike, e identifikuar si helm për minj, në një kavanoz ushqimi për foshnje të markës HiPP, konkretisht në një produkt 190 gramësh me pure karrote dhe patate.
Ngjarja nuk mbetet e izoluar. Testime të ngjashme në Republikën Çeke dhe Sllovaki kanë dhënë sinjale paraprake për të njëjtin rrezik, duke e kthyer incidentin në një çështje jo më të izoluar që kërkon reagim të menjëhershëm. Si masë sigurie, mbi 1,500 supermarkete kanë tërhequr produktet nga qarkullimi.
Kompania prodhuese HiPP ka konfirmuar praninë e helmit dhe nuk përjashton mundësinë e një akti të qëllimshëm kriminal. Kompania thotë se incidenti mund të jetë rezultat i ndërhyrjes së jashtme dhe, si masë paraprake, të gjitha produktet janë tërhequr nga raftet.
Ndërkohë, policia u bën thirrje konsumatorëve të tregojnë kujdes të shtuar, duke paralajmëruar për shenja të dyshimta si kapakë të dëmtuar, etiketa të pazakonta apo erë të çuditshme.
Në një treg ku siguria e ushqimit për foshnje konsiderohet e panegociueshme, ky incident rikthen në vëmendje sa e brishtë mund të jetë zinxhiri i besimit nga prodhuesi tek konsumatori.
and then