‘Tmerri’ i bizneseve! Punësohej në subjekte të ndryshme dhe vidhte xhiron ditore, arrestohet 39-vjeçarja

Një 39-vjeçare Kumrie Zika është arrestuar në Tiranë, pasi dyshohet se punësohej përkohësisht në biznese të ndryshme me qëllim vjedhjen e xhirove ditore.

Policia bën me dije se në kuadër të operacionit të koduar “Skema” janë dokumentuar 5 raste vjedhjesh në subjekte të ndryshme. Sipas hetimeve, 39-vjeçarja punësohej në biznese të ndryshme dhe, pasi siguronte akses në ambientet e tyre, dyshohet se vidhte xhiron ditore përpara se të largohej.

Ajo u kap në ambientet e një lokali në Tiranë nga efektivët e Forcës së Posaçme “Shqiponja”. Operacioni u zhvillua nga Komisariati i Policisë Nr. 1 dhe Nr. 2, në bashkëpunim me Forcën e Posaçme “Shqiponja”.

Ndërkohë, policia vijon hetimet për zbardhjen e rasteve të tjera të mundshme të vjedhjeve që mund të jenë kryer nga 39-vjeçarja.

Njoftimi i policisë

Tiranë/Finalizohet operacioni policor i koduar “Skema”, i zhvilluar nga Komisariati i Policisë Nr. 1 dhe Komisariati i Policisë Nr. 2, në bashkëpunim me Forcën e Posaçme “Shqiponja”.

Punësohej në subjekte të ndryshme me qëllim që të vidhte xhirot ditore, vihet në pranga 39-vjeçarja.

Dokumentohen 5 raste vjedhjesh në subjekte të ndryshme.

39-vjeçarja u kap në ambientet e një lokali në Tiranë, nga Forca e Posaçme “Shqiponja”.

Në vijim të punës hetimore për parandalimin dhe goditjen e krimeve kundër pasurisë, si dhe për zbardhjen e ngjarjeve të ndodhura më parë, strukturat e Komisariatit të Policisë Nr. 1 dhe Komisariatit të Policisë Nr. 2, në bashkëpunim të ngushtë me Forcën e Posaçme “Shqiponja”, finalizuan me sukses operacionin policor të koduar “Skema”.

Si rezultat i operacionit u bë kapja dhe ndalimi  i shtetases të shpallur në kërkim K. Z., 39 vjeçe, banuese në Tiranë.

Nga hetimet e kryera, dyshohet se kjo shtetase punësohej përkohësisht në subjekte të ndryshme në Tiranë me qëllim për të vjedhur xhirot ditore, përpara se të largohej.

Në kuadër të këtij operacioni u dokumentuan 5 raste vjedhjesh të ndodhura në territoret e Komisariateve Nr. 1 dhe 2.

Punohet për zbardhjen e vjedhjeve të tjera që mund të ketë kryer kjo shtetase.

Materialet procedurale i kaluan Prokurorisë, për veprime të metejshme.