Një aksident rrugor ka ndodhur pasditen e sotme në Nartë, Vlorë, ku një mjet i llojit “Benz” taksi është përplasur me shtyllën.
Gazetari Enrik Mehmeti raportoi për “BalkanWeb” se në brendësi të tij kanë qenë 6 veta së bashku me shoferin mes tyre dy fëmijë, 15 vjeç dhe 7 vjeç.
Nga aksidenti kanë mbetur 6 persona të plagosur mes tyre disa rëndë, të cilët janë transportuar me tre ambulanca në drejtim të spitalit të Vlorës. Policia në vendngjarje ka nisur hetimet për zbardhjen e rrethanave. Paraprakisht dyshohet se drejtuesi i mjetit ka qenë nën efektin e alkoolit. Pas aksidentit policia ka arrestuar shoferin.
Informacion paraprak
Rreth orës 17:20, në rrugën e fshatit Nartë, shtetasi S. D., 54 vjeç, duke drejtuar automjetin (taksi), dyshohet se ka humbur kontrollin dhe si pasojë automjeti ka dalë nga rruga.
Si pasojë e aksidentit kanë mbetur të dëmtuar drejtuesi i automjetit dhe pasagjerët, shtetasit M. D., 45 vjeçe, L. P., 76 vjeç, E. P., 63 vjeçe dhe 2 fëmijë të moshave 7 dhe 15 vjeç, të cilët ndodhen në spitalin e Vlorës, nën kujdesin e mjekëve.
Grupi hetimor ndodhet në vendngjarje dhe po punon për zbardhjen e plotë të rrethanave të aksidentit.
Në vijim të veprimeve, në lidhje me aksidentin e ndodhur gjatë ditës së sotme, në fshatin Nartë, ku shtetasi S. D, duke drejtuar automjetin tip “Benz” (taksi), në të cilën udhëtonte me bashkëshorten, 2 fëmijët e tij dhe 2 të afërm të tjerë, të cilët ndodhen në spital, jashtë rrezikut për jetën, ka humbur kontrollin e automjetit dhe si pasojë është përplasur me një shtyllë, ju informojmë se:
Nga specialistët për Qarkullimin Rrugor në DVP Vlorë, u bë arrestimi në flagrancë për veprat penale “Shkelja e rregullave të qarkullimit rrugor” dhe “Drejtimi i automjeteve në mënyrë të parregullt” i shtetasit S. D, 54 vjeç, banues në Vlorë, i cili pas kryerjes së testit të alkoolit ka rezultuar se drejtonte mjetin në gjendje të dehur në masën 0.987 mg/l.
Materialet i kaluan Prokurorisë, për veprime të mëtejshme.
and then