Zhyl Kunde është për momentin një nga shqetësimet e mëdha të Barcelonës. Klubi katalanas shpenzoi miliona për afrimin e tij nga Sevilja pak javë më parë. Por nga 6 afrimet e bëra nga Barcelona në merkaton e verës, vetëm mbrojtësi francez nuk ka mundur të federohet.
Kjo pasi Barcelona duhet të ulë shpenzimet e saj në mënyrë që të regjistrojë Kundenë. E sigurt është se Kunde nuk do të jetë në fushë as në takimin e së dielës në La Liga kundër Sociedadit dhe do të presë takimin e 29 gushtit të ardhshëm për të zbritur në fushë, natyrisht nëse klubi do të ketë bërë detyrat e tij.
Sipas përllogaritjeve të bëra nga mediat spanjolle, as shitja e mundshme e Memfis Depait te Juventusi nuk do të mjaftonte për federimin e Kundesë. Kjo do të thotë se te Barcelona duhet të shesin edhe ndonjë lojtar tjetër në mënyrë që të federojnë mbrojtësin 23-vjeçar. Pas Depait, Barcelona po lëviz në merkato, teksa klubi po punon edhe për shitjen e lojtarëve të tjerë të padëshiruar si Dest, Brethuejt e Umtiti.
Arena e Lajmit