Bayern Munich vazhdon kërkimet për të përforcuar repartin ofensiv dhe një nga emrat më të përfolur në merkaton e verës është Ismael Saibari. Mesfushori ofensiv i PSV Eindhoven po fiton gjithnjë e më shumë terren në listën e dëshirave të klubit bavarez.
25-vjeçari, i cili përfaqëson Marokun në arenën ndërkombëtare, vjen pas sezonit më të mirë të karrierës së tij. I shpallur lojtari më i mirë i sezonit në kampionatin holandez, Saibari kontribuoi me 15 gola dhe 8 asistime në 27 ndeshje, duke luajtur një rol vendimtar në fitimin e titullit nga PSV Eindhoven.
Karakteristika që e bëjnë veçanërisht tërheqës për Bayernin janë fleksibiliteti dhe aftësia për të mbuluar disa pozicione në sulm. Ai mund të luajë si mesfushor ofensiv, në krahun e majtë apo edhe si sulmues, profil që përputhet me kërkesat e drejtuesve sportivë të klubit gjerman.
Pas dështimit të operacionit për Anthony Gordon, i cili zgjodhi Barcelonën, Bayerni ka intensifikuar kontaktet për Saibarin. Sipas raportimeve të mediave ndërkombëtare, edhe vetë futbollisti e sheh me interes një transferim në Mynih.
Megjithatë, negociatat nuk pritet të jenë të lehta. PSV Eindhoven nuk ka nevojë të shesë dhe kontrata e lojtarit është e vlefshme deri në vitin 2029. Klubi holandez vlerëson kartonin e tij rreth 50 milionë euro.
Ndërkohë, fokusi i Saibarit mbetet te angazhimet me kombëtaren e Marokut në Kupën e Botës. Një paraqitje e suksesshme në turneun më prestigjioz të futbollit mund të rrisë edhe më shumë vlerën e tij në treg dhe ta afrojë drejt një transferimi të madh te Bayern Munich.
and then