Vodhën “Benz”-in, e çmontuan në pjesë dhe më pas i shitën, arrestohen dy të rinjtë në Tiranë

TIRANË

Vodhën një automjet, e çmontuan në pjesë dhe më pas i shitën ato, vihen në pranga 2 të rinj në Tiranë.

Specialistët për Hetimin e Krimeve të Komisariatit të Policisë Nr. 3, në vijim të punës për goditjen e paligjshmërisë në fushën e vjedhjes së pronës dhe pasurisë, identifikimin e autorëve të vjedhjeve dhe vënien e tyre përpara përgjegjësisë ligjore, bazuar dhe në informacionet e siguruara përmes inteligjencës informative, kanë organizuar dhe finalizuar operacionin policor të koduar “Demolition”.

Si rezultat i këtij operacioni u bë ndalimi i shtetasve:
– Xh. S., 29 vjeç dhe A. M., 26 vjeç, për veprën penale “Vjedhja”, kryer në bashkëpunim.

Këta shtetas, më datë 24.01.2023, kanë vjedhur një automjet tip “Benz”, në Laprakë. Nga veprimet hetimore ka rezultuar se shtetasit Xh. S. dhe A. M., pasi kanë vjedhur automjetin, e kanë çmontuar atë dhe pjesët e tij i kanë shitur në pika shitjesh për pjesë të përdorura automjetesh.

Në cilësinë e provës materiale u sekuestruan 2 aparate celulare, një pajisje DVR me pamje filmike, si dhe pjesë të ndryshme të automjetit të vjedhur.

Materialet i kaluan Prokurorisë, për veprime të mëtejshme procedurale.