Inspektori i Lartë i Drejtësisë ka reaguar pas vrasjes së gjyqtarit Astrit Kalaja dhe plagosjes së dy qytetarëve, ngjarje e rëndë që ndodhi sot në ambientet e Gjykatës së Apelit të Juridiksionit të Përgjithshëm në Tiranë.
Në deklaratën e tij, Inspektori shpreh tronditjen e thellë për këtë akt të rëndë, duke e cilësuar si një tragjedi që prek jo vetëm familjen e gjyqtarit të ndjerë, por gjithë trupën gjyqësore, sistemin e drejtësisë, dhe vetë shtetin e së drejtës.
“Ngjarja që i mori jetën një magjistrati në krye të detyrës dhe la të plagosur dy qytetarë është një alarm i madh për sigurinë në institucionet e drejtësisë,” thuhet në reagim.
Ai u shpreh me ngushëllime të sinqerta për familjen, të afërmit dhe kolegët e gjyqtarit Kalaja, ndërsa uroi shërim të shpejtë për të plagosurit.
Në deklaratë nënvizohet se siguria duhet të jetë një prioritet absolut, dhe se garantimi i paprekshmërisë së përfaqësuesve të drejtësisë është thelbësor për funksionimin e shtetit ligjor.
Inspektori i Lartë i Drejtësisë inkurajoi gjyqtarët dhe prokurorët të vazhdojnë misionin e tyre me përkushtim, pavarësisht kësaj goditjeje të rëndë ndaj sistemit.
“Solidarizohem me gjithë trupën gjyqësore dhe inkurajoj çdo gjyqtar e prokuror që të vijojë detyrën me integritet, duke zbatuar ligjin,” përfundon deklarata.
BalkanWeb
and then