Nënkryetari dhe deputeti i Partisë Demokratike, Agron Gjekmarkaj, i ftuar në emisionin “Kjo Javë” në News24, reagoi ndaj deklaratës së Komisioneres së BE-së për Zgjerimin, Marta Kos, e cila në një konferencë së bashku me kryeministrin Edi Rama u shpreh se zgjedhjet në Shqipëri kanë qenë të “lira dhe të ndershme”.
Gjekmarkaj tregoi se kishte pasur një bisedë paraprake me komisioneren Kos, në praninë e ambasadorit të BE Silvio Gonzato, para daljes publike ku ajo bëri deklaratën që u komentua gjerësisht.
“Unë pata mundësi të flas me zonjën Kos në praninë e ambasadorit Gonzato para asaj deklarate dhe të shpreh shqetësimet e opozitës. Të gjitha problemet e mëdha që shqetësojnë sot vendin dhe opozitën,” tha deputeti demokrat, duke theksuar se deklarata e mëvonshme e komisioneres e la të habitur.
Ai u shpreh se nuk e priste që Kos të merrte, sipas tij, “anësi” në interpretimin e raportit të OSBE/ODIHR për zgjedhjet. “Deklarata e saj për zgjedhje të lira e të ndershme më la pak të surprizuar, sepse nuk e prisja që ajo të hiqej si një lexuese e njëanshme e raportit të OSBE/ODIHR,” deklaroi ai, duke shtuar se nuk është etike të zbulojë detajet e bisedës private me komisioneren.
Gjekmarkaj theksoi se raporti zyrtar i OSBE/ODIHR-it për zgjedhjet e fundit përmban kritika serioze, të cilat, sipas tij, e rrëzojnë pretendimin se procesi ka qenë i paanshëm dhe standard.
“Deklarata e saj, ku tha se kemi pasur zgjedhje të lira dhe të ndershme, ndërkohë që raporti i OSBE e rrëzon këtë. Zonja Kos duhet t’ia kursente vetes dhe Shqipërisë një koment të tillë, që dukej më shumë si favor për kryeministrin,” tha Gjekmarkaj.
and then