Nuk ka rëndësi nëse janë pjesë e Partisë Demokratike apo asaj Socialiste, kur bie shi, janë një. Ky bashkim është treguar më së miri në seancën e fundit plenare, ku të kushtëzuar nga kushtet e motit, deputetët kundërshtarë janë detyruar të bëjnë ‘paqe’.
Një prej dysheve që u shfaqën së bashku në çadër janë Gazment Bardhi dhe deputetja e PS, Klotilda Bushka. Ka qenë Bushka që në këtë rast ka marrë në çadrën e saj deputetin e PD-së, madje jo vetëm kaq, por edhe e ka mbajtur ajo çadrën.
Të dy ligjvënësit kanë ecur për disa metra së bashku, duke mos folur shumë, por të pashqetësuar nga sytë e fotografëve që po fiksonin këtë moment, ku veç bashkimit në çadër, shkonin të kombinuar më së miri edhe në ngjyrat kuqezi që kishin zgjedhur krejt rastësisht.
